काठमाडौं: हुलाक सेवा विभाग मातहत जिल्ला जिल्लामा शाखा रहेका हुलाक बचत बैंक र यसका शाखाहरु राष्ट्रिय बाणिज्य बैंकमा गाभिने भएका छन् ।
नेपाल सरकार मन्त्रिपरिषदको यही असार १२ गतेको बैठकले “हुलाक बचत बैंकमा रहेका खाता एवं बचत रकम हुलाक सेवा विभागले राष्ट्रिय वाणिज्य बैंकमा हस्तान्तरण गर्ने” निर्णय गरेको थियो ।
बैंकले आज मंगलबार एक सूचना प्रकाशन गरी हस्तान्तरण प्रकृया नसकिँदासम्म यही असार २६ देखि २९ गतेसम्म तीन दिन हुलाक बचत बैंकको कारोबार रोक्का राख्ने जनाएको छ । जुन जिल्लामा हुलाक बचत बैंक छन् सोही जिल्लाको राष्ट्रिय वाणिज्य बैंकको शाखामा हस्तान्तरण गरिने बैंकको सूचनामा उल्लेख छ ।
हाल देशभर ६८ जिल्लामा हुलाक बचत बैंक रहेका छन् ।
हुलाक ऐन,२०१९ अन्र्तगत जारी भएको हुलाक बचत बैंक नियमावली,२०३३ अनुसार नेपालमा आर्थिक बर्ष २०३३/३४ देखि हुलाक बचत बैंक प्रारम्भ भएको थियो । देशभरि छरिएर रहेको सानो सानो पूँजीलाई बचतको रुपमा संकलन गरी नागरिकहरुको बचत गर्ने बानीको विकास तथा देश विकासमा टेवा पुर्याउने उद्देश्यका साथ हुलाक बचत बैंक स्थापना गरिएको हो ।
हुलाक बचत बैंकमा बचत खाताको मात्र कारोबार हुन्छ र बचतकर्तालाई दिनुपर्ने व्याज सरकारले व्यहोर्ने व्यवस्था मिलाइएको छ । नेपालको निशाना छाप प्रयोग गर्ने नेपालको यो एकमात्र बैंक हो ।
हुलाक बचत बैंकका विशेषताहरु
· सबै नेपाली नागरिकले सजिलै खाता खोली रकम जम्मा गर्न सक्ने,
· रु ५००।– मा नै खाता खोली न्युनतम मौज्दात पनि रु ५००।– मात्र भए पुग्ने,
· व्याज आयमा कुनै किसिमको कर, शुल्क नलाग्ने,
· पूर्णतया सरकारी स्वामित्वमा रहेको बैंक,
· नि:शुल्क चेक बुक उपलब्ध हुने ,
· प्रत्येक महिनाको ब्याज गणना गरिने र गणना गरिएको व्याज आर्थिक वर्षको अन्तमा साँवामा परिणत गरिने,
· नि:शुल्क रुपमा खाताको विवरण ९क्तबतझभलत ० प्राप्त गर्न सकिने,
· दुई वा दुई भन्दा बढी व्यक्तिको नाममा संयुक्त खाता खोली रकम जम्मा गर्न सकिने,
· न्यूनतम रु १०,०००।– देखि अधिकतम रु ४,५०,०००।– सम्म ऋण लगानी गर्न सकिने व्यवस्था
