काठमाडौँ। नेकपा (एमाले) का अध्यक्ष केपी शर्मा ओलीले ललिता निवासको जग्गासम्बन्धी छानबिन स्टन्टबाजी मात्र भएको बताउनुभएको छ ।
स्ववियु काउन्सिल नेपालको भेलालाई शुक्रबार काठमाडौँमा उहाँले ललिता निवासको जग्गाको छानबिन गर्ने कुरा अहिले हिरो बन्ने स्टन्टमात्र भएको बताउनुभएको हो ।
उक्त प्रकरणको छानबिन आफ्नो नेतृत्वको सरकारले गरेको भन्दै अध्यक्ष यस प्रकरणमा अहिलेको सत्ता गठबन्धका नेताहरु तानिने बताउनुभयो ।
“यसमा गठबन्धनकै मान्छे पर्ने हुन् । हाम्रो पार्टीको कसैको छोराले जमिन किनेको थियो, धनीपुर्जा हेरेर किन्यो होला, सबै प्रक्रिया पुर्यायो होला । अहिले मानौं एमालेकै कोही मान्छे यसमा छ जस्तो प्रचार गरिरहेका छन् । ललिता निवासको दोषी को को हुन् ? कहिलेबाट जफत गरिएका जमिन कांग्रेसीहरुलाई फिर्ता गर्न थालियो ? सरकारले प्रष्ट पारोस्”, उहाँले भन्नुभयो ।
