एजेन्सी । पाकिस्तानी क्रिकेट टोलीका कप्तान बाबर आजमले विश्वकपमा भारतलाई हराउनु मात्र पर्याप्त नभएको बताएका छन् ।
पाकिस्तानी टोलीले श्रीलंका भ्रमणअघि कराँचीमा प्रशिक्षण शिविर गरिरहेको छ । यहाँ बाबर आजमले भने, ‘हामी भारतसँग मात्र होइन विश्वकप खेल्न जान्छौं । भारत बाहेक अन्य ८ टिम हुनेछन् । उनीहरुलाई हराएपछि मात्र फाइनल खेल्न सक्छौं । हाम्रो फोकस एउटा टोलीमा मात्र होइन, सम्पूर्ण प्रतियोगितामा केन्द्रित छ । हामी सबैसँग राम्रो खेलेर जित्ने योजनामा छौं ।’
एकदिवसीय विश्वकप अक्टोबर ५ देखि भारतमा सुरु हुँदैछ । भारत र पाकिस्तानबीचको हाईभोल्टेज भिडन्त अक्टोबर १५ मा अहमदाबादको नरेन्द्र मोदी स्टेडियममा हुनेछ ।
विश्वकपमा पाकिस्तानको पहिलो खेल ६ अक्टोबरमा नेदरल्याण्ड्ससँग हुनेछ । टोलीले अक्टोबर १२ मा श्रीलंकासँग खेल्नेछ, त्यसपछि टोलीले अक्टोबर १५ मा अहमदाबादको नरेन्द्र मोदी स्टेडियममा टीम इन्डियासँग खेल्नेछ ।
टोलीले अक्टोबर २० मा अष्ट्रेलिया, २३ अक्टोबरमा अफगानिस्तान, २७ अक्टोबरमा दक्षिण अफ्रिका, ३१ अक्टोबरमा न्युजिल्याण्ड र ४ नोभेम्बरमा बंगलादेशसँग खेल्नेछ । पाकिस्तानको अन्तिम खेल नोभेम्बर १२ मा इंग्ल्याण्डसँग हुनेछ ।
यसैबीच, पाकिस्तान सरकारले अहिलेसम्म टोलीको भारत भ्रमणको पुष्टि गरेको छैन । विश्वकपका लागि १० स्थान तय भएका छन् । भारतले लिग चरणमा आफ्ना ९ खेल ९ स्थानमा खेल्नेछ भने पाकिस्तानले आफ्ना सबै लिग चरणका खेल ५ स्थानमा मात्र खेल्नेछ ।
