काठमाडौँ । विश्वासको मत लिने भन्दै बिहीबारका लागि बोलाइएको बैठकबाट कोशी प्रदेशका मुख्यमन्त्री हिक्मत कार्की बाहिरिएपछि बैठक स्थगित भयो । फलस्वरुप विश्वासको मत लिने अवस्था भएन । आफूले विश्वासको मत नपाउने अवस्था सिर्जना भएपछि बैठक छल्ने नियतले कार्की बाहिरिएका बाहिरिनुभएको थियो ।
त्यसअघि बैठकमा मुख्यमन्त्री कार्कीले आफूलाई विश्वासको मत दिन आग्रह गर्दै आफू सर्वदलीय सरकार बनाउन समेत तयार भएको बताउनुभएको थियो । उहाँ आफूलाई विश्वासको मत नदिए अर्को सरकार बन्न सक्ने अवस्था नभएकाले मध्यावधिमा जान तयार हुन समेत भन्नुभएको थियो ।
विश्वासको मत लिने प्रस्ताव पेश भएपछि नेपाली कांग्रेस, माओवादी केन्द्र, एकीकृत समाजवादील विश्वासको मत नदिने स्पष्ट पारिसकेका थिए भने जनता समाजवादी पार्टीले तटस्थ बस्ने निर्णय गरेको थियो ।
उक्त छलफलपछि मुख्यमन्त्री कार्कीले जवाफ दिने र विश्वासको मत लिने प्रस्तावमाथि मतदान हुनुपर्ने थियो । तर कार्कीले आफूले विश्वासको मत नपाउने अवस्था देखेपछि जवाफ दिनका लागि समय चाहिएको भन्दै बैठकबाट बाहिरिएपछि फर्कनु भएन र बैठक आज शुक्रबारका लागि स्थगित भएको छ ।
बैठक आज ११ बजेका लागि बोलाइएको छ । र, कार्यसूची अनुसार बैठक प्रक्रिया अघि बढे विश्वासको मत पाउने वा नपाउने आज टुंगो लाग्नेछ । मुख्यमन्त्री कार्कीले हिजो नियतवश बैठक सार्नुको अर्थ रातभरमा सत्ता जोगाउने प्रयास नै हो । यद्यपि आजको बैठकमा बैठक सार्ने निर्णय कति प्रभावकारी बन्यो त्यो भने हेर्न बाँकी नै छ ।
नयाँ सरकार गठनका लागि पाँचदलीय गठबन्धनसँग पनि बहुमत छैन । हाल प्रदेशसभामा कांग्रेसका २९, माओवादी केन्द्रका १३, एकीकृत समाजवादीका ४ र जसपाका एक प्रदेशसभा सदस्य छन् । तर माओवादी केन्द्रबाट निर्वाचित बाबुराम गौतम सभामुख भएकाले उनको नाम समेत समावेश गरेर सरकार गठनका लागि बहुमत मिल्ने वा नमिल्ने विवाद छ ।
