काठमाडौँ । ललिता निवास प्रकरणमा पक्राउ परेकाहरूमध्ये भाटभटेनी सुपरमार्केटका सञ्चालक मीनबहादुर गुरुङसहित अन्य दुई जनालाई स्लाइनसहित सरकारी वकिलको कार्यालय लगिएको छ ।
ललिता निवास प्रकरणमाथि थप अनुसन्धान गर्न म्याद थपको प्रक्रियाका लागि पक्राउ परेका चार जनालाई सरकारी वकिलको कार्यालय लगिएको हो ।
पक्राउ परेकामध्ये गुरुङसहित तीन जना बिरामी भएपछि उनीहरुलाई हिजो मंगलबार महाराजगंजस्थित शिक्षण अस्पतालमा भर्ना गरिएको थियो । उनीहरुलाई अस्पतालबाटै नेपाल प्रहरीको केन्द्रीय अनुसन्धान ब्युरो (सीआईबी) ल्याएर म्याद थपका लागि सरकारी वकिलको कार्यालय लगिएको हो ।
स्लाइन चढाएकै अवस्थामा स्लाइनको बोतल हातमा बोकेर उनीहरु सरकारी वकिलको कार्यालय पुगेका हुन् ।
ललिता निवास प्रकरणमा गुरुङ, तत्कालीन मालपोत अधिकृत धर्मप्रसाद गौतम, कर्मचारी गोपाल कार्की र पूर्वनिर्वाचन आयुक्तसमेत रहेका भक्तपुर मालपोतका तत्कालीन हाकिम सुधीर शाह पक्राउ परेका छन् । पत्रकार सम्मेलन गरी सीआईबीले प्रकरणमा संलग्न अन्यमाथि निगरानी रहेको जनाएको छ ।
