काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी) ले ललिता निवासमा कीर्ते गरेको अभियोगमा पक्राउ परेकाहरुलाई म्याद थपका लागि जिल्ला अदालत काठमाडौँ लैजाने तयारी गरेको छ।
सीआईबीले गरिरहेको अनुसन्धानका लागि पक्राउ परेर न्यायिक हिरासतमा रहेका उनीहरुलाई म्याद थपका लागि अदालत लैजान लागिएको हो।
मंगलबार अदालतको अनुमतिमा उनीहरुलाई पक्राउ गरिएको थियो भने कीर्तेमा अनुसन्धान गर्नका लागि समय माग गर्दै अदालत पेस गर्ने तयारी गरेको बताइएको छ।
सीआईबीले निर्वाचन आयोगका पूर्व आयुक्त सुधीरकुमार शाह, भाटभटेनी डिपार्टमेन्ट स्टोरका सञ्चालक मिनबहादुर कुँवरसहित ७ जनालाई पक्राउ गरेको थियो।
पक्राउ परेकामध्ये तीन जना सर्वोच्च अदालतको स्टे अर्डर देखाएर छुटेका थिए। न्यायिक हिरासतबाट छुटेका उनीहरु बाहेक शाह, गुरुङसहितका आरोपितहरुलाई प्रारम्भिक अनुसन्धानका लागि अदालत पेस गर्न लागिएको हो।
