काठमाडौं । मलेसियामा जारी एसिसी यू–१६ इस्टर्न जोन कपमा नेपालले थाईल्यान्डलाई २२५ रनको भारी अन्तरले पराजित गरेको छ । यो जितसँगै नेपालले सेमिफाइनलमा स्थान बनाएको छ ।
जितको लागि २ सय ७० रनको विजयी लक्ष्य पछ्याएको थाईल्यान्ड नेपालको घातक बलिङमा १३.२ ओभरमा अलआउट हुदै ४४ रनमा स्तब्ध हुन पुग्यो । थाईल्यान्डका स्थेन बेनर्जिले सर्वाधिक १६ रन बनाए । यस्तै, दानुफोन ३३ बलमा ३ चौकासहित १२ रन बनाएर आउट हुँदा ओपनर आर्शिवाद नारायणलार्य र जित सादा शून्य रनमा आउट भए । थाईल्यान्डका ८ ब्याटरले एक रन पनि बनाउन सकेनन् ।
नेपालका स्पिनर सन्तोष यादवले ह्याट्रिकसहित ५ विकेट लिए । सन्तोषले ३.२ ओभरमा १ मेडनसहित ८ रन खर्चेर ५ विकेट लिए । त्यस्तै अशोक धामीले ३ ओभरमा २ मेडनसहित ४ रन खर्चेर ३ विकेट लिदा अभिषेक तिवारीले ४ ओभरमा १ मेडनसहित २१ रन खर्चेर २ विकेट लिए ।
त्यसअघि मलेसियाको बांगीमा टस जितेर पहिला ब्याटिङ रोजेको नेपालले निर्धारित ३५ ओभरमा ८ विकेट गुमाउँदै २ सय ६९ रन बनाएको थियो ।
नेपालका निरज कुमार यादवले ४३ बलमा ७ चौका र ६ छक्कासहित सर्वाधिक ७४ रन बनाए। उनले २१ बलमै अर्धशतक पूरा गरेका थिए । नेपाललाई ओपनर निरज कुमार यादव र सुर्यांशु कोइरालाले १३ ओभरमा १ सय १० रनको शतकीय साझेदारी गर्दै उत्कृष्ट सुरुवात दिलाएका थिए । सुर्यांशुले ५५ बलमा ३ चौकासहित ४० रन बनाए भने नरेन भट्ट ५५ रनमा नटआउट रहे ।
यस्तै, सन्तोष यादव ४२ रनमा आउट हुँदा आषिश लुहार १३, अशोेक धामी ५ र अभिषेक तिवारी १४ रन बनाए ।
थाईल्यान्डका निटपाखन मनुवुनले ६ ओभरमा ५० रन खर्चेर २ विकेट लिए । यस्तै, ईशान बानेर्जी र पनुवातले दुई दुई विकेट लिँदा जित सादा र पियावत नोद्रीले एक एक विकेट लिए ।
