काठमाडौं। जारी विश्वकप छनोटअन्तर्गत वेस्ट इन्डिजले नेपाललाई जितको लागि ३४० रनको विशाल लक्ष्य दिएको छ । जिम्बावेको हरारे क्रिकेट मैदानमा टस हारेर पहिला ब्याटिङको निम्तो पाएको वेस्ट इन्डिजले निर्धारित ५० ओभरमा ७ विकेटको क्षतिमा ३३९ रन बनायो ।
वेस्ट इन्डिजको लागि कप्तान शाई होप र निकोलस पुरनले शानदार शतक प्रहार गरे । कप्तान होपले १२९ बलमा १० चौका र ३ छक्काको सहयोगमा १३२ रन बनाए । यस्तै पुरन ४४ औं ओभरको अन्तिम बलमा ९४ बलमा १० चौका र ४ छक्कासहित १ सय १५ रन बनाएर दीपेन्द्रसिंह ऐरीबाट कट एन्ड बोल्ड भए । चौथो विकेटको लागि होप र पुरनले २ सय १६ रनको दोहोरो शतकीय साझेदारी गरेका थिए ।
यस्तै, वेस्ट इन्डिजका ब्रान्डान किंगले ३२ रन बनाउदा रोभमन पवेलले २९ रन जोडे । इन्डिजका अन्य कुनै ब्याटरले दोहोरो अंकका रन बनाउन सकेनन् ।
नेपालका लागि ललित राजवंशीले सर्वाधिक तीन विकेट लिए । यस्तै, दीपेन्द्रसिंह ऐरी, सन्दीप लामिछाने, करन केसी र गुल्सन झाले एक एक विकेट लिए।
