काठमाडौँ । सोमबार दिउँसो चार राजनीतिक दल मिलेर समाजवादी मोर्चा घोषणा गरे । नेकपा माओवादी केन्द्र, नेकपा एकीकृत समाजवादी, जनता समाजवादी र नेकपा कम्युनिष्ट पार्टी मिलेर गठन गरेको समाजवादी मोर्चामा यसैका सुत्रधार भनिएका डा बाबुराम भट्टराई भने अटाएनन् ।
समाजवादी मोर्चा गठन गर्ने अभियानमा सुरुआती भूमिका निर्वाह गरेको भट्टराईलाई अन्तिम समयमा ल्याएर धोका दिइएको धेरैको आँकलन छ । यसैबीच डा बाबुराम भट्टराईले समाजवादी मोर्चा गठनलाई लिएर कटाक्ष गर्नुभएको छ ।
सामाजिक सञ्जाल ट्विटरमार्फत उहाँ समाजवादी मोर्चालाई निजी सत्ता स्वार्थकानिम्ति भित्री र बाहिरि शक्तिहरुसँग बार्गेनको हतियार बनाउने दुष्कर्म नहोस् भन्दै सचेत गराउनुभएको छ । उहाँले केहीलाई सधैँ र केहीलाई केही बेर ठग्न सकिन्छ तर सबैलाई सधैँ ठग्न सकिन्न भन्ने हेक्का राख्न सुझाव दिनुभएको छ ।
समाजवाद संसदीय अंक गणित मिलाएर र जालझेर गरेर आउने उपभोग्य वस्तु होइन । यो त उदात्त वैचारिकीको निर्देशनमा उन्नत चेतना र उच्च नैतिक धरातल भएका मानवको लामो सामूहिक प्रयत्नले निर्माण हुने अति उन्नत सभ्यताको चरण हो । कथित समाजवादी मोर्चालाई निजी सत्ता स्वार्थकानिम्ति भित्री र बाहिरि शक्तिहरुसँग बार्गेनको हतियार बनाउने दुष्कर्म नहोस् । केहीलार्ई सधैँ र केहीलाई केही बेर ठव्न सकिन्छ तर सबैलाई सधैँ ठग्न सकिन्न भन्ने हेक्का रहोस् ।
