काठमाडौँ । प्रस्तावित प्रधानन्यायाधीश हरिकृष्ण कार्कीले आफू तत्कालीन प्रधानन्यायाधीको आग्रहमा न्यायाधीश भए पनि काम भने निष्ठापूर्वक गरेको बताउनुभएको छ ।
आज विहानदेखि संसदीय समितिमा भएको सुनुवाइका क्रममा उहाँले आफ्नो इच्छा नहुँदा पनि तत्कालीन प्रधानन्यायाधीशले भित्रै बसेर काम गर्नुपर्छ भनेपछि आफू न्यायाधीश भएको बताउनुभयो । ‘सर्वोच्च अदालतमा न्यायाधीश बन्ने अवसर आयो, तर मलाई न्यायाधीश बन्ने इच्छा थिएन । तर तत्कालीन प्रधानन्यायाधीशले आग्रह गरेपछि त्यसलाई स्वीकार गरेको हुँ, न्यायाधीशका रुपमा इमान, निष्ठा र व्यावसायिक धर्मलाई पूर्णरुपमा पालना गरी काम गरिरहेको छु ।’
उहाँले परिस्थिति र सौभाग्यले पछिल्लो आठ महिनायता कायम मुकायम प्रधानन्यायाधीशको जिम्मेवारी पनि सम्हालेको बताउनुभयो । कार्की २०७२ फागुन १८ गते न्यायाधीशमा सिफारिस भइ २०७३ साउन १७ मा न्यायाधीश बन्नुभएको थियो ।
न्यायाधीश भएपछि आफूले न्यायालयमा हुने ६० प्रतिशत न्यायिक विचलन रोकेको समेत दाबी गर्नुभयो । उहाँले आफ्नो कार्ययोजना सुनाउँदै विचलन रोक्न सफल भएको न्यायिक स्वच्छता कायम गर्ने दिशामा अघि बढेको समेत बताउनुभयो ।
कार्कीमाथि विहान ८ बजेदेखि सुनुवाई सुरु भएको हो । कार्कीविरुद्ध २९ वटा उजुरी दर्ता भएको छ । समितिले बुधबार २९ वटा उजुरीकर्तासँग छलफल गरी आज कार्कीलाई बोलाएको हो ।
समितिमा कार्कीले योजना समेत प्रस्तुत गर्नुहुनेछ भने उहाँ उपर परेका उजुरीबारे पनि प्रश्न गरिनेछ । समितिले अनुमोदन गरेको अवस्थामा कार्की प्रधानन्यायाधीशमा नियुक्त हुनुहुनेछ ।
कार्कीलाई प्रधानन्यायाधीशमा नियुक्तका लागि गत वैशाख २५ गते सिफारिस गरिएको थियो । तर संसदीय समिति गठन नहुँदा सुनुवाइ हुन सकेको थिएन ।
सुनुवाइ समितिमा कांग्रेबाट रेमश लेखक, ईश्वरीदेवी न्यौपाने, जीवन परियार, ज्ञानेनद्रबहादुर बार्की र रमेशजंग रायमाझी हुनुहुन्छ । साथै नेकपा एमालेबाट पदम गिरी, महेशकुमार बर्तौला, लिलानाथ श्रेष्ठ, ईश्वरी जीएम र देवेन्द्र दाहाल हुनुहुन्छ । साथै नेकपा माओवादी केन्द्रबाट जर्नादन शर्मा, जगप्रसाद शर्मा, राष्ट्रिय स्वतन्त्र पार्टीबाट डोलप्रसाद अर्याल र जसपाबाट प्रकाश अधिकारी हुनुहुन्छ ।
कार्की आगामी साउन १९ गतेदेखि अवकाशमा जानुहुनेछ ।
