काठमाडौं । प्रधानन्यायाधीश चोलेन्द्र शमशेर जबराविरुद्धको महाअभियोग प्रस्तावको प्रस्तावक नेपाली कांग्रेसकी सचेतक पुष्पा भुसालले प्रधानन्यायाधीश जबराले जसरी आफ्नो काम कारबाही अगाडी बढाउनुपथ्र्यो सो अनुसार गर्न नसकेका कारण २१ बुँदे आरोपपत्र सहित महाअभियोग प्रस्ताव दर्ता गरिएको बताउनुभयो ।
उहाँले कार्य व्यवस्था परामर्श समितिमा महाअभियोग सिफारिस समिति गठन भई बाँकी प्रक्रिया अगाडी बढ्ने जानकारी दिनुभयो ।
उहाँले भन्नुभयो – ‘लामो समयदेखि सर्वोच्च अदालत जुन ढंगबाट अगाडी बढ्नुपथ्र्यो सर्वोच्च अदालतको नेतृत्व गर्ने प्रधानन्यायाधीशले जुन किसिमबाट आफ्नो काम, कारबाहीहरु अगाडी बढ्नुपथ्र्यो र समग्र न्याय क्षेत्रलाई अझै बढी प्रभावकारी बनाउनुपथ्र्यो त्यो सबै कुराहरु अवरुद्ध भएको कारणले पनि अहिले आज संविधान अनुसार एक चौथाई प्रतिनिधि सभाको सदस्यहरुले महाअभियोग प्रस्ताव हामीले दर्ता गरेका हौँ । यो महाअभियोग प्रस्ताव दर्ता भइसकेपछि अब समितिले आफ्नो काम, कारबाही अगाडी बढाउने छ । कार्य व्यवस्था समितिमा महाअभियोग समिति गठन हुनेछ । र त्यसका लागि उसले आफ्नो अलग्गै किसिमबाट प्रक्रिया बढाउने छ । एमसीसी लगायतका अरु विषयवस्तुहरुलाई त्यो त संसदमा पेश गर्नुपर्दछ भनेर नेपाली कांग्रेसले स्पष्ट रुपबाट आफ्नो दृष्टिकोण राखिसकेको छ । अरु दलहरुसँग पनि सहकार्यहरु अगाडी बढाइराखेको छ ।’
संघीय संसद सचिवालयले सोमबारका लागि बोलाइएको संसद बैठक स्थगित गरी ४ गते दिउँसो १ बजे बस्नेगरी सुचना टाँस गरेको छ ।
