काठमाडौँ । राष्ट्रियसभाका अध्यक्ष गणेशप्रसाद तिमिल्सिनाले १९८ विद्यार्थीलाई आज ‘एम्बेसेडर अफ पाकिस्तान छात्रवृत्ति’ प्रदान गर्नुभएको छ ।
नेपालस्थित पाकिस्तानी राजदूतावासले आयोजना गरेको ११औँ वार्षिक छात्रवृत्ति पुरस्कार समारोहमा उहाँले यस वर्ष ४३ विद्यालयका १९८ उत्कृष्ट विद्यार्थीलाई एउटा ल्यापटपसहित पुरस्कृत गर्नुभएको हो ।
दूतावासका अनुसार नेपालभरका सम्बन्धित प्रधानाध्यापकहरूद्वारा छानिएका सरकारी विद्यालयका योग्य/उत्तम विद्यार्थीहरूलाई उक्त छात्रवृत्ति प्रदान गरिन्छ ।
सो अवसरमा अध्यक्ष तिमिल्सिनाले पाकिस्तानको निरन्तर सहयोग र दुई देशबीच विशेषगरी शिक्षाको क्षेत्रमा जनता–जनताको सम्पर्कलाई अगाडि बढाएकोमा प्रशंसा गर्नुभयो ।
दूतावासको प्रयासले दुई देशका युवाहरूलाई नजिक ल्याउन निकै लामो यात्रा गरेको उल्लेख गर्दै उहाँले यो नेपाल र पाकिस्तानबीचको घनिष्ट मैत्रीपूर्ण सम्बन्धको प्रतिबिम्ब भएको बताउनुभयो ।
कार्यक्रममा नेपालस्थित पाकिस्तानका राजदूत अबरार एच हाश्मीले छात्रवृत्ति कार्यक्रमलाई थप विस्तार गर्ने र पाकिस्तान–नेपाल द्विपक्षीय सम्बन्धलाई थप मजबुत बनाउने आफ्नो संकल्प र इच्छा रहेको बताउनुभयो ।
उनले नेपाली युवाको अध्ययन, खेलकुद र स्वस्थ सामाजिक गतिविधिमा प्रोत्साहन गर्नु नै दुई मुलुकबीचको सहकार्यको मुख्य आधार रहेको बताउनुभयो ।
सन् २०१३ मा सुरु भएको एम्बेसडर अफ पाकिस्तान छात्रवृत्ति कार्यक्रम विगतका वर्षहरूमा बढ्दै गएको र नेपाली युवाहरूमाझ लोकप्रिय बन्दै गएको दूतावासले जनाएको छ ।
