काठमाडौँ । नेपाली कांग्रेसका सांसद चन्द्र भण्डारी तीन महिनापछि प्रतिनिधिसभाको बैठकमा उपस्थित हुनुभएको छ । गत फागुन ४ मा घरमा ग्यास सिलिन्डर लिक भएर आगलागी हुँदा फागुन ४ गते जलेर गम्भीर घाइते हुनुभएका उहाँ भारतमा उपचार गराएर केही दिनअघिमात्र फर्किनुभएको थियो ।
बुधबारको बैठकमा सभामुख देवराज घिमिरेले उहाँका लागि बोल्न १२ मिनेटको समय दिनुभएको थियो । उहाँलाई बसेरै बोल्ने व्यवस्था मिलाइएको थियो ।
संसद्मा उहाँले आफू कीर्तिपुर जाँदा निदाएको र मुम्बईमा सात दिनपछि ब्युँझिएको बताउनुभयो । “ब्युँझँदा धेरै साथीहरूले सहयोग गरेको पाएँ, त्यो सहयोगको सम्मान गर्दै सरकारले दिने सहयोग हस्पिटल बनाउनमा प्रयोग होस्”, उहाँले भन्नुभयो ।
सांसद भण्डारीले अरु देशका भन्दा नेपालका स्वास्थ्यकर्मी र डाक्टरहरू कम नभएको भन्दै आफ्नो उपचारमा सघाउने सरकारप्रति आभार व्यक्त गर्नुभयो ।
भारतबाट फर्किएपछि पत्रकार सम्मेलनमा उहाँले आधुनिक जलन उपचार केन्द्र निर्माण गर्न जोड दिनुभएको थियो । उहाँले त्यसका लागि आफू नेतृत्व लिन तयार रहेको बताउनुभएको थियो । उहाँको सम्पूर्ण उपचार खर्च सरकारले बेहोर्ने निर्णय गरेको थियो ।
“छिमेकी देशमा मलाई पठाएर मैले त्यहाँ मलाई डाक्टरहरुले भन्नुभयो । विगतको तीन वर्षमा तीनजना मात्रै भेन्टिलेरमा गएर बाँचेका रहेछन् । म सौभाग्यले बाचेर आएर यहाँ बोल्न पाइरहेको छु”, उहाँले भन्नुभयो ।
सांसद भण्डारीका अनुसार उहाँले उपचार गराएको बाउछोराले चलाएको अस्पताल एसियाकै उत्कृष्ट रहेको र नेपालमा यसको कमी नरहेको उल्लेख गर्नुभयो ।
उहाँले भन्नुभयो, “मैले प्रधानमन्त्रीलाई अनुरोध गरेको छु, हामीले एउटा हस्पिटल बनायौँ भने एसियाको सबैभन्दा सबल हस्पिटल नेपाल बन्नसक्छ । यो अनुरोध प्रधानमन्त्रीलाई गर्ने अवसर पाएँ ।”
