हेटौँडा । नेकपा (एमाले)का सचेतक महेश बर्तौला अस्पताल भर्ना भएका छन् । उच्च ज्वरो आएपछि उनलाई मदन भण्डारी स्वास्थ्य विज्ञान प्रतिष्ठान, हेटौँडा अस्पतालमा भर्ना गरिएको हो ।
शुक्रवार अस्पताल भर्ना गरिएको उनका स्वकीय सचिव आशिष अस्लामी मगरले जानकारी दिए । बर्तौलालाई २८ गते रातिबाट एक्कासि ज्वरो आएको थियो र ज्वरो नघट्ने देखेपछि २९ गते साँझ हेटौँडा अस्पतालमा पुर्याइएको थियो ।
बर्तौलालाई घाँटीको टन्सिल र कमजोरीका कारण ज्वरो आएको अस्पताल प्रशासनले जनाएको छ ।
मकवानपुर क्षेत्र नम्बर २ का सांसद बर्तौला केही दिनदेखि गृह जिल्ला मकवानपुरको विभिन्न कार्यक्रमहरूमा सहभागी भएका थिए ।
