काठमाडौँ । नेकपा (एकीकृत समाजवादी) को विद्यार्थी संगठनहरुले भ्रष्टाचारीहरुलाई तत्काल कानूनी दायरामा ल्याइ कारबाही गर्न माग गर्दै प्रदर्शन गरेको छ ।
बिहीवार पार्टीको भ्रातृ संगठन अनेरास्ववियुले माईतीघर मण्डलामा जम्मा भइ भ्रष्टाचारीलाई कानूनी कठघरामा ल्याउन माग गर्र्दै प्रदर्शन गरेको हो । उनीहरुले भूटानी शरणार्थी प्रकरणमा मुछिएकाहरु सबै व्यक्तिलाई छिटो भन्दा छिटो अनुसन्धान गरी कानूनी दायरामा ल्याउनुपर्ने बताएका छन् । प्रदर्शनका क्रममा बोल्दै पार्टी निकट विद्यार्थी संगठन अनेरास्ववियुका अध्यक्ष सुदेश पराजुलीले नक्कली भूटानी शरणार्थी प्रकरणमा संलग्न सबैलाई छिटो भन्दा छिटो पक्राउ गरी कानूनी दायरामा ल्याउन माग गर्नुभयो । उहाँले पूर्वगृहमन्त्री बालकृष्ण खाँणलार्य पक्राउ गर्नु सरकारको राम्रो काम भएको भन्दै अन्य संलग्न व्यक्तिहरुको अनुसन्धान र कारबाही अघि बढाउनुपर्ने बताउनु भयो । उहाँले नेकपा एमाले सचिव टोपबहादुर रायमाझीलाई पनि कानूनी कठघरामा ल्याउन ढिलो गर्नु नहुने बताउनु भयो ।
उहाँले भन्नुभयो, ‘सरकारले शरणार्थी समस्याको समाधान गर्न आयोग बनाउने कोशिष गरिएको रहेछ, त्यसमा भित्रै रहेर भ्रष्टाचार गर्ने नक्कली शरणार्थी खडा गरेर करोडौं भ्रष्टाचरा गर्नेहरुको बिरुद्धमा हामी प्रदर्शनमा उत्रिएका छौँ । यसमा सहभागीहरुलाई पक्राउ गरिरहेको छ, सरकारले यो राम्रो काम हो, पूर्व गृहमन्त्री पक्राउ पर्नुभएको छ, त्यो राम्रो हो, नेकपा एमालेका सचिव टोपबहादुर रायमाझीलाई पनि पक्राउ गर्नुपर्छ । छिटो भन्दा छिटो कानूनी कठघरामा ल्याउनुपर्छ र बाँकी सहभागीहरुलाई पनि तत्काल कारबाहीको दायरामा ल्याउनुपर्छ ।’
अध्यक्ष पराजुलीले अहिलेको सरकारले सुशासनका पक्षमा चलाएको अभियान स्वागतयोग्य रहेको बताउनु भयो ।
