काठमाडौँ । नेकपा (एमाले) का अध्यक्ष केपी शर्मा ओलीले नक्कली भुटानी शरणार्थी प्रकरणमा पार्टीका निलम्बित सचिव टोपबहादुर रायमाझीप्रति आशंका भए पनि अहिल्यै नै अपराधी भन्न नसक्ने बताउनुभएको छ ।
पार्टी केन्द्रीय समितिको बैठकमा उहाँले रायमाझी संलग्न भएको भनेर अहिल्यै नै करार गर्न नसकिने बताउनुभयो । उहाँले उक्त प्रकरणमा पूर्वाग्रही ढंगले कसैलाई फसाउन खोजिएको आशंका गर्नुभयो । भ्रष्टाचारको प्रकरणमा छानबिनको क्रममा कसैलाई फसाउन बलजफ्ती मोड्ने प्रयास भइरहेको उहाँको भनाइ थियो ।
“भ्रष्टाचार प्रकरणमा हाम्रै पार्टीका साथीहरूको नाम आएको छ । हाम्रै सरकारमा रहेका साथीहरूको नाम आएको छ । जोसुकैको नाम आओस् यदि दोषी छ भने कारबाही हुनुपर्छ”, अध्यक्ष ओलीले भन्नुभयो, “जबसम्म मान्छे दोषी ठहरिँदैन दोषी रहन्छ कि भन्ने आशंका गर्न सकिन्छ । तर, हामी अपराधी हो भनेर करार गर्न वा दोषी नै छ भनेर करार गर्न सक्दैनौँ । त्यसको अदालति प्रक्रिया बाँकी हुन्छ । त्यसमा हामीले ढुक्क धारणा बनाउन सक्दैनौं ।”
