काठमाडौँ । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले नक्कली भुटानी शरणार्थी प्रकरणमा अहिलेसम्म भएका कारबाहीबारे संसद्लाई जानकारी गराउन माग गर्नुभएको छ ।
प्रतिनिधिसभाको बुधबार बसेको दोस्रो बैठकमा विशेष समयमा उहाँले यो राज्य विरुद्धकै अपराध भएको उल्लेख गर्दै यसमा पूर्व उपप्रधानमन्त्री, गृहमन्त्रीहरुको नाम जोडिएर आउनु लज्जास्पद भएको बताउनुभयो ।
“यस्तो जघन्य अपराधमा संलग्न कुनै पनि मानिसलाई छुट दिने त कल्पना नगरौँ, कमजोर बनाउने काम सम्म कसैले गर्न हुन्न”, उहाँले भन्नुभयो ।
पछिल्लो समय प्रहरीले अनुसन्धान नगर्ने हो कि अख्तियारलाई बुझाउने हो कि जस्ता तर्कहरु आउन थालेका भन्दै अध्यक्ष लिङ्देनले यस्ता गल्ती नगर्न आग्रह गर्नुभयो ।
प्रहरी अनुसन्धाबारे अनेक आशंका आएको र शीर्ष नेताहरुको बैठकलाई समेत त्यससँग जोडेर हेरिएको उहाँको भनाइ थियो ।
उहाँले भन्नुभयो, “शीर्ष नेताहरु, सरकारको गलत मनसाय छैन भन्ने प्रष्ट पार्न पनि अहिलेसम्म भएका कारबाहीका प्रगति संसद्लाई जनकारी गराउनुपर्यो भनेर माग राख्न चाहन्छौँ ।”
