काठमाडौँ । यहि वैशाख २९ गते अर्थात् आउँदो शुक्रबारदेखि देशभर प्रदर्शन हुन लागेको चलचित्र ‘हल्कारा’को – म हेर्न जाँदै छु तपाई नि ?’ क्याम्पेनले यतिबेला सामाजिक सञ्जालमा व्यापक चर्चा बटुलिरहेको छ ।
विभिन्न अन्तर्राष्ट्रिय फेस्टिवलहरुमा उत्कृष्ट सावित भएको यस चलचित्रलाइ नेपाली सिने जगतमा वहुप्रतिक्षित सिनेमाको रुपमा मानिएको छ ।
प्रदर्शन अगावै प्रतिष्ठत चलचित्र महत्सवहरुमा प्रशंसा र अवार्डहरु जितेको यो चलचित्र हेर्न करिब ३ दिन मात्रै बाँकी रहँदा स्वतस्फुर्त रुपमा समाजिक सञ्जालमा पोष्टहरु देखिन थालेका छन् ।
पोखराका पत्रकार स्याम रानाले एउटा पोस्टर डिजाइन गरेर सुरु गरेको क्याम्पेनमा यतिबेला धेरै नै जोडिईसकेका छन् । पोखरा–काठमाडौं लगाएत ठाउँहरुका पत्रकार, लेखक, शिक्षक, इन्जिनियर तथा विभिन्न पेसाकर्मीहरुले आफ्नो पोष्टहरु सेयर गरिरहेका छन् ।
यद्यपि, चलचित्र कस्तो छ र कस्तो व्यपार गर्ला भन्ने हेर्न बाँकी नै छ। त्यसका लागि दर्शकले अब तिन दिन पर्खनु पर्नेछ । चलचित्रमा एक हुलाकीका माध्यमबाट देशको अर्थ राजनीतिलाई फरक तरिकाले भनिएको निर्माण पक्षले जनाएको छ ।
चलचित्रमा हुलाकी को भुमिकामा चपलिहाइट–३ र प्रसाद–२ का अभिनेता महेश त्रिपाठीको मुख्य भुमिका रहेको छ । अभिनेता त्रिपाठीले यही चलचित्रमार्फत अमेरिकाको वल्र्ड फेस्ट ह्युस्टन फिल्म फेस्टिभलमा उत्कृष्ट अभिनेताको अवार्ड जितेका थिए । उनीसँगै छायाँकारले अवार्ड जितेपछि चलचित्रको चर्चा सुरु भएको त्रिपाठी बताउँछन् । ‘हल्कारा’लाई कालोपोथी, सेतो सूर्य, ऐना झ्यालको पुतलीको श्रेणीमा बुझिएको छ ।
चलचित्रमा हल्काराको श्रीमतीको भूमिका विनिता थापामगरले निर्वाह गरेकी छन् । रङ्गमञ्च हुँदै चलचित्रको पर्दामा आइपुगेकी अभिनेत्री थापामगरले अडिसन दिएर पात्रलाई प्राप्त गरेकी थिइन् ।
चलचित्रमा उमेश तामाङ, पशुपति राई, दीपक क्षेत्री, विद्या कार्की आदि कलाकारले अभिनय गरेका छन् । यसको लेखक निर्देशक विक्रम सापकोटासँगै कवि विप्लव प्रतीक र आकाश बराल छन् । चिन्तन राजभण्डारी छायाँकार रहेको चलचित्रलाई कालीपार स्टुडियो र आइसफल प्रडक्सन मिलेर निर्माण गरेका हुन् ।
