एजेन्सी । पाकिस्तानका पूर्वप्रधानमन्त्री इमरान खान पक्राउ परेका छन् ।
बीबीसीका अनुसार खानलाई इस्लामाबादस्थित अदालत बाहिरबाट अर्धसैनिक बलका अधिकारीहरूले गिरफ्तार गरेका हुन् । भ्रष्टाचारसम्बन्धी आरोप लगाइएको मुद्दाबारे उनी अदालतमा उपस्थित हुन लागेका थिए ।
इमरानको पार्टी पाकिस्तान तेहरिक–ए–इन्साफ (पीटीआई)ले इमरानलाई कुटपिट भएको आरोप लगाएको छ । पार्टीले इमरानका वकिल रगतले लतपतिएको भिडियो पनि पोस्ट गरेको छ । एक प्रत्यक्षदर्शीले पाकिस्तानको अखबार ‘द डन’लाई बताए कि इमरान खान उच्च अदालतमा प्रवेश गर्ने बित्तिकै अर्धसैनिक बल र सशस्त्र टोली पनि उच्च अदालतमा प्रवेश गरे । गेटमा बख्तरबन्द गाडीहरू राखिएको थियो र लगत्तै इमरानलाई पक्रेर बाहिर ल्याइयो ।
आईजी अकबर खानले कादिर ट्रस्ट मामिलामा इमरानलाई पक्राउ गरिएको बताए । पीटीआईको विरोधको आशंकालाई ध्यानमा राख्दै अकबर खानले भने, ‘हामीले धारा १४४ लागू गरेका छौं र यसको उल्लंघन गर्नेलाई कारबाही गरिने छ ।’
हालै इमरानले शीर्ष गुप्तचर अधिकारीहरूलाई वजिराबादमा उनको हत्या गर्ने षड्यन्त्र रचिएको आरोप लगाएका थिए । पाकिस्तानी सेनाले यी आरोपको खण्डन गरेको छ । यसपछि इमरानले आज एक भिडियो सार्वजनिक गर्दै फेरि आरोप दोहोर्याएका छन् । करिब ४ घण्टापछि उनलाई अदालतबाट पक्राउ गरिएको हो ।
आफूमाथि लगाइएका आरोप राजनीतिक रूपले अभिप्रेरित भएको भन्दै पूर्वप्रधानमन्त्री खानले त्यसलाई अस्वीकार गर्दै आएका छन् ।
