काठमाडौँ । नेपाली काँग्रेसका सांसद प्रदीप पौडेलले नेपालमा शिक्षाको उद्देश्य स्पष्ट नरहेको बताउनुभएको छ ।
आईतवार उच्च शिक्षा र वैदेशिक शिक्षाको अवस्थाबारे अन्तरक्रिया कार्यक्रममा बोल्दै उहाँले यस्तो बताउनुभएको हो ।
उहाँले सरकारले शिक्षाको स्पष्ट उद्देश्य तय गर्न अझै नसकेको बताउनु भयो । उहाँले संघीय शिक्षा ऐन नआउँदा धेरै प्रश्न खेपिरहेको उल्लेख गर्दै संघीय शिक्षा ऐनले पनि शिक्षाको उद्देश्य स्पष्ट पार्न नसक्ले दाबी गर्नुभयो । उहाँले शिक्षाको सैद्धान्तिक उद्देश्य के हो भन्ने बारेमा संघीय शिक्षा ऐनले स्पष्ट पार्न नसक्ने बताउनु भयो । उहाँले निजी क्षेत्रमा राम्रो शिक्षा प्रदान हुन्छ भन्नेकुरा पनि पछिल्लो समय खस्कँदै गएको बताउनु भयो ।
उहाँले भन्नुभयो, ‘नेपालमा शिक्षाको उद्देश्य स्पष्ट छ्रैन । राज्यले शिक्षाको उद्देश्य तय गर्न सकेको छैन । संघीय शिक्षा ऐन नआएको भनेर व्यापक रुपमा प्रश्न खेपिरहनु परेको छ । त्यो आएपनि त्यसले उद्देश्य तय गर्ने स्थिति देखिरहेको छैन । खालि प्रशासनिक ढंगबाट कसरी तौरतरिका मिलाउने भन्ने सम्बन्धी मात्रै छ ।
संघमा गएको प्रदेशले के गर्ने, पालिकाले के गर्ने ? यसको सैद्धान्तिक उद्देश्य के हो ? यसका बारेमा यो शिक्षा ऐन पनि स्पष्ट छ जस्तो मलाई लाग्दैन । राज्यको काम अहिले जम्मा एफिलेशन दिने मात्रै छ । त्यसलाई व्यवस्थित ढंगले कसरी चलाउने ? त्यसले राष्ट्रिय उद्देश्य कसरी पूरा गर्ने भन्ने छैन । एफिलेशन दिने मात्रै कुरा प्रधान हो भन्ने लाग्दैन । निजी क्षेत्रले राम्रो शिक्षा दिन्छ भन्ने थियो त्यो पनि बिग्रँदै गयो । किनभने छाता त सरकारकै नियन्त्रणमा हुन्छ ।’
नेता पौडेलले नेपालमा गुणस्तरीय शिक्षा छैन भन्ने सन्देश विश्वमा फैलिरहेको बताउनु भयो ।
