काठमाडौं । सहिद स्मारक ‘ए’ डिभिजन लिगमा मनाङ–मर्स्याङ्दी क्लबले लगातार पाँचौ हार बेहोरेको छ ।
एन्फा कम्प्लेक्समा विभागीय नेपाल पुलिस क्लबसँग १–० ले पराजित हुँदै मनाङले इतिहासकै खराब नतिजा बनाएको हो । यसअघि मनाङले लिगमा कहिल्यै पनि लगातार पाँच हार बेहोरेको थिएन ।
एन्फा कम्प्लेक्समा मंगलबार भएको खेलमा पहिलो हाफमा पुलिस क्लबका भारतीय फरवार्ड मोहम्मद आशिकले पेनाल्टीमार्फत गरेको गोल नै निर्णायक बन्यो ।
पेनाल्टी बक्समा मनाङका रन्दिप पौडेलले फउल गरेपछि मोहम्मद पेनाल्टीमा चुकेनन् र पुलिसलाई १–० को अग्रता दिलाए। त्यही अग्रतालाई जोगाउँदै पुलिसले मनाङलाई पाँचौं हार चखायो ।
सुरुवाती ७ खेलमा अपराजित रहेको मनाङले लगातार पुलिससँगै सातदोबाटो, जावलाखेल, आर्मी र खुमलटारसँग हार बेहोर्यो ।
यस हारसँगै मनाङको १२ खेलबाट १५ अंकमा सीमित हुँदै आठौं स्थानमा यथावत छ । मनाङलाई हराएको पुलिस १२ खेलमा ९ अंक जोडेर पुछारमा छ ।
