काठमाडौं । सहिद स्मारक ‘ए’ डिभिजन लिगमा फ्रेन्ड्स क्लब कुपन्डोलले न्युरोड टिम (एनआरटी) लाई पराजित गरेको छ ।
मंगलबार त्रिपुरेश्वरस्थित दशरथ रंगशालामा भएको खेलमा फ्रेन्ड्सले एनआरटीलाई ३–१ ले पराजित गरेको हो । फ्रेन्ड्सको जितमा रफिक एमिनु, तोरिच जेब्रिन र कप्तान प्रकाश बुढाथोकीले गोल गरे । एनआरटीका सन्जिव विष्टले एक गोल फर्काए ।
खेलको १४औं मिनेटमा रफिक एमिनुले गोल गर्दै फ्रेन्ड्सलाई १–० को अग्रता दिलाएका थिए । सन्तोष खत्रीको पासमा रफिकले वान भर्सेस वानको स्थितिमा सहज फिनिस गरे ।
४०औं मिनेटमा एनआरटीका सन्जिव विष्टले गोल गर्दै खेललाई १–१ को बराबरीमा ल्याए ।
पहिलो हाफको इन्ज्युरी समयको तेस्रो मिनेटमा तोरिच जेब्रिनले फ्रिकिकमा गोल गर्दै फ्रेन्ड्सलाई पहिलो हाफमा २–१ को अग्रता दिलाए । निकोलस सर्ज सङले फउल गरेपछि प्राप्त फ्रिकिकमा तोरिच चुकेनन् ।
यस्तै, कप्तान प्रकाश बुढाथोकीले लक्ष्मण रुचालको क्रसमा खेलको ७६औं मिनेटमा गोल गर्दै फ्रेन्ड्सलाई ३–१ को अग्रता दिलाए ।
८०औं मिनेटमा लक्ष्मणकै क्रसमा रफिकले प्रयास गरेपनि बारमा लागेर फर्कदा फ्रेन्ड्सले थप अग्रता बढाउन सकेन । ८५औं मिनेटमा तोरिचको पेनाल्टी बक्सभित्रको प्रहारलाई एनआरटीका गोलरक्ष महतले डाइभ गरेर बचाए ।
यस जितसँगै फ्रेन्ड्सले १२ खेलबाट १४ अंक जोडेको छ । पराजित एनआरटीको १२ खेलबाट १३ अंक छ ।
