रुपन्देही । लुम्बिनी प्रदेशका मुख्यमन्त्री लीला गिरीले सोमबार दोस्रोपटक विश्वासको मत लिँदैछन् ।
पुस २७ मा मुख्यमन्त्रीमा नियुक्त भएका एमाले संसदीय दलको नेता गिरीले माघ ५ मा विश्वासको मत पाएका थिए । तर, पछि माओवादी काङ्ग्रेसको सरकार बन्दा ५ दलले उनीमाथिको समर्थन फिर्ता लिएपछि गिरी अल्पमतमा परेका हुन्।
८७ सदस्यीय प्रदेशसभामा अहिले एमालेको २९ सांसद र राप्रपाको ४ सांसद सरकारमा छन् ।
विपक्षमा रहेका सत्ता गठबन्धनका ५३ सांसदले कांग्रेस दलका नेता डिल्ली चौधरीलाई मुख्यमन्त्री बनाउन प्रदेश प्रमुख अमिक शेरचनसमक्ष दाबी गरिसकेका छन् । विश्वासको मत लिनुअघि मुख्यमन्त्री गिरीले माओवादीसहित अन्य दलहरुसँग छलफल गरेपनि विश्वासको मत दिनेबारे कुनै सहमति भएको छैन ।
आइतबार भएको एमाले संसदीय दलको बैठकले आज सदनमा विश्वासको मत माग्ने निर्णय गरेको थियो । संसदीय दलको बैठकले सबै दलसँग प्रदेशको स्थायित्वको लागि आग्रह गर्ने र सम्भावना नभए धारा ३ अनुसार सरकार गठन प्रकृयामा जाने निर्णय गरेको थियो ।
