अमेरिकी विदेशमन्त्री एन्टोनी ब्लिेन्केनले सोमबार रुसले यसै साताको सुरुमा युक्रेनविरुद्ध कारवाही गर्नसक्ने बताएका छन् । फ्रान्स २४ सँगको अन्तरवार्तामा उनले युक्रेनविरुद्ध हुने कारवाहीप्रति अमेरिका चिन्तित रहेको बताए ।
पेन्टागनले सप्ताहन्तमा रुसले युक्रेन वरिपरि सेनाको सङ्ख्या बढाएको बताएको छ । उसले रुस–युक्रेन सीमा र बेलारुसमा रुसी सेनाको सङ्ख्या एक लाखभन्दा बढी रहेको अनुमान गरेको छ ।
ब्लिन्कनका अनुसार विश्व शक्ति राष्ट्रहरुले तनाव घटाउन बारम्बार आग्रह गरेको भए पनि मस्कोको सैन्य निर्माणले तनाव बढाउने सङ्केत गरेको छ ।
“हामीले देखिरहेका सबै कुरा, युक्रेनको वरिपरि रूसी सेनाको तैनाथीको सन्दर्भमा हामीलाई रुसले यसै साताको सुरुमा युक्रेनविरुद्ध कारवाही गर्ने निष्कर्षमा पुर्याउँछ”, ब्लिन्केनले भने ।
अमेरिकाले रुसलाई कूटनीतिक बाटो अपनाउनुपर्छ भनेर विश्वस्त गराउन सम्भव भएसम्म सबै गरिरहेको उनले बताए । यद्यपि उनले रुसले युक्रेनमा आक्रमण गर्ने निर्णय गरे त्यसका लागि वासिङ्टन तयार रहेको चेतावनी दिए ।
“हामी हाम्रा सबै युरोपेली सहयोगी र साझेदारहरूसँग नजिकको समन्वयमा यसका लागि पूर्णरूपमा तयार छौँ”, उनले भने ।
