काठमाडौँ । नेपाली कांग्रेसका सभापति शेरबहादुर देउवा र नेपाली काँग्रेसको विद्रोही समूहको रुपमा चिनिने पूर्वसहमहामन्त्री गोविन्दराज जोशी समुहबीचको वार्ता बिना निष्कर्ष टुङ्गिएको छ । बैशाख १० को उपनिर्वाचनको विषयलाई लिएर सोमबार देउवा निवास धुम्बाराहीमा भएको वार्ता बिनानिष्कर्ष टुंगिएको हो ।
वार्तामा सभापती देउवा र जोशी पुत्र दिपकराज जोशी सहभागी थिए । सो क्रममा सभापती देउवाले गोविन्दराज जोशीलाई पार्टीको केन्द्रीय सदस्यको प्रस्ताव गरेका थिए । सो प्रस्ताव जोशी समूहले अस्वीकार गरेको छ । बुबालाई केन्द्रिय सदस्य बनाएर थामथुम गर्ने प्रयास रहेकोमा त्यसलाई आफूले अस्विकार गरेको दिपक बताउँछन् ।
तनहुँमा प्रभावशाली हैसियत निर्माण गरेका जोशीसमूहलाई हातमा लिएर तनहुँ क्षेत्र नम्बर १ को उपनिर्वाचन जित्ने रणनीति नेपाली काँग्रेसको छ । स्रोतका अनुसार जोशी समुहले गोविन्दराज जोशीलाई पार्टीको वरिष्ठ नेता बनाउनु पर्ने, केहीलाई केन्द्रिय सदस्य बनाउनुपर्ने र तनहुँ जिल्ला कार्य समितिमा ३३ प्रतिशत सहभागिता गराउनुपर्ने अडान राखेको छ ।
उपचुनावलाई मध्यनजर गर्दै काँग्रेसले केही दिन अघि पूर्वमन्त्री गोविन्दराज जोशीमाथि गरेको कारबाही फिर्ताको निर्णय गरेको थियो । तर, कांग्रेसले आफूलाई कारबाही गरेर साधारण सदस्यबाट समेत निष्कासन गरिसकेकाले त्यस पार्टीसँग आफ्नो कुनै सम्बन्ध नरहेको प्रस्ट पारिसकेका छन् ।
सभापती देउवासँगको वार्ता असफल भएपछि जोशी समुहले अब आफ्नो ढङ्गले अगाडी बढ्ने तयारी भएको दिपक जोशीले बताए । चाँडै नै विज्ञप्ति मार्फत धारणा सार्वजानिक गर्ने जोशीको भनाई छ । यद्यपि, उपनिर्वाचनमा कसलाई सहयोग गर्ने भन्ने बारेमा जोशी समूहले निर्णय गरेको छैन । तनहुँ–१ मा जोशी समूहको ६ हजार बढी मत रहेको बताइन्छ ।
