काठमाडौँ । नेकपा एमालेका सचेतक एवं प्रतिनिधिसभा सदस्य महेश कुमार बर्तौलाले प्रधानमन्त्रीको सरकारी निवास बालुवाटारमा देश बन्ने योजना बन्नुको सट्टा सत्ताको भागबन्डाले तमासा निम्त्याएको बताउनु भएको छ ।
बुधबारको प्रतिनिधिसभामा बोल्दै सांसद बर्तौलाले लोकतन्त्रभित्र जनताले आफ्नो आवाज सरकारसमक्ष राख्न नपाउने भन्दै चिन्ता व्यक्त गर्नुभयो ।
उहाँले भन्नुभयो ‘प्रधानमन्त्री निवास बालुवाटारमा देश बनाउने योजना बन्नुपथ्र्यो । त्यसमा बालुवाटारले समय व्यतित गर्नुपथ्र्यो । तर बालुवाटारको सत्ताको छिनाझम्टीको तमासा देशले देखेकोर ब्यहोरेको छ । संसदको पहिलो शक्ति भन्ने पार्टी (कांग्रेस) सरकारमा जोडिएको छ । तर बालुवाटारको गेटमा कति मन्त्रालय पाउँछ भनेर धर्ना दिइरहेको छ । सडकमा नागरिकले बोल्न पाउने बनेको अवस्था छैन । लोकतन्त्रको मसिहा भन्ने पार्टी सरकारमा रहँदा जनताले आफ्नो आवाज सरकारसमक्ष राख्न खोज्दा सुरक्षाकर्मी लगाएर मुख थुनिन्छ ।’
सांसद बर्तौलाले प्रश्न गर्नुभयो – ‘के तपाईहरुको लोकतन्त्र यही हो जहाँ नागरिकले आफ्ना गुनासोहरु जनतासामु राख्दा प्रहरी र सुरक्षाकर्मी लगाएर मुख थुन्ने ?’
