काठमाडौँ । नेकपा एमालेका सचेतक एवं प्रतिनिधिसभा सदस्य महेश कुमार बर्तौलाले सत्ता पक्षका सांसदहरुबाट पटक–पटक संसदीय मर्यादाको नियमको उल्लंघन गरेको भन्दै नियमापत्ति जनाउनु भएको छ ।
प्रतिनिधिसभाको जारी बैठकमा नियमापत्ति जनाउँदै उहाँले भन्नुभयो – ‘यो विषय मैले पटक–पटक उठाउनुपर्यो । आज पनि मैले यही विषयमा सभामुखको ध्यानाकर्षण गराउनुपर्यो । सांसदहरुले बैठकमा आफ्नो विचार राख्दै गर्दा प्रतिनिधिसभाको नियमावली २०७५ को नियम २० को ६ बमोजिम मैले यसमा नियमापत्ति गरेँ । सभामुखको आसन र बोल्ने माननीय ज्यूको बीचबाट आज पनि सांसदहरु पार्टी कार्यालयमा प्रवेश गरे जसरी हात मिलाउँदै हिँड्नुभयो । सत्तापक्षका सांसदहरुबाट पटक–पटक संसदीय मर्यादाको नियमको उल्लंघन गर्ने कुरा किमार्थ स्वीकार्य हुन सक्दैन । यसमा म ध्यानाकर्षण गराउन चाहन्छु ।’
यसअघि आइतबारको संसद बैठकमा उहाँले सत्तारुढ दलकै सांसदले प्रतिनिधिसभा नियमावलीको धज्जी उडाउने काम गर्नु गम्भिर विषय भएको भन्दै नियमापत्ति जनाउनुभएको थियो ।
त्यसलगत्तै सभामुख देवराज घिमिरेले यस्तो विषयमा ध्यान दिन सचेत गराउनु भएको थियो । सोही विषयमा सभामुखसँग समय माग गरेर कांग्रेस उपसभापति पूर्णबहादुर खड्काले प्रतिनिधिसभा नियमावली आफूले उलंघन गरेको स्विकार गर्दै माफी माग्नु भएको थियो ।
