विराटनगर । प्रदेशको नामाकरणको विरोधमा आन्दोलनमा उत्रिएका प्रदर्शनकारी र प्रहरीबीच झडप हुँदा विराटनगर तनावपूर्ण बनेको छ ।
मंगलबार दिउँसो विराटनगरको रोडशेष चोकमा दुई पक्षबीच झडप हुँदा दुवैतर्फबाट २० भन्दा बढी घाइते भएका छन् ।
प्रदर्शनकारीलाई लखेट्न प्रहरीले १७ राउण्ड हवाई फायर गरेको छ भने ४४ सेल अश्रुग्यास प्रहार गरेको छ ।
विराटनगरको होटल बिगमा आयोजित कार्यक्रममा प्रदेशसभा सदस्यहरु सहभागी हुने जानकारी पाएपछि आन्दोलनकारी घेर्नका लागि विराटनगर आएका थिए । पहिचानका आधारमा प्रदेशको नामकरण गर्नुपर्ने र कोशी नाम खारेज गर्नुपर्ने मागसहित विभिन्न दल र संघसंस्थाका कार्यकर्ताहरु आन्दोलनमा उत्रिएका हुन् ।
पहिचानका आधारमा नाम राख्न दबाव दिन भन्दै आएका आन्दोलनकारीलाई प्रहरीले रोक्न खोजेपछि दुई पक्षबीच झडप निम्तिएको हो ।
