काठमाडौं । नेकपा एमालेका अध्यक्ष केपी शर्मा ओलीले कोशी प्रदेश सरकार जोगाउने दावि गरेका छन् ।
मिसन ग्रासरुट अन्तर्गत झापामा आयोजित एक कार्यक्रमलाई सम्बोधन गर्दै ओलीले राप्रपाको साथमा प्रदेश सरकार जोगिने बताएका हुन् ।
‘हामी कोशी प्रदेशको सरकार टिकाउँछौं। टिकाउछौं भन्ने मुख्य कुरा चाहिँ राप्रपा हो । हामीसँग ४० सीट छ । राप्रपासँग ६ सीट छ। अब एउटा खोज्नुपर्ने छ। किनभने हामीलाई राप्रपाले साथ दिन्छ भन्ने आधारमा’, ओलीले भने ।
ओलीले दश दलीय गठबन्धनलाई लार्भाको संज्ञा दिदै देश खान लागिपरेको आरोप लगाए। उनले एमालेलाई एक्लाउन बाह्य शक्तिहरुले लागिपरेको बताए ।
उनले प्रदेशसभामा चार भोटबाहेक सबैको सर्वसम्मतिले प्रदेशको नाम कोशी राख्न सफल भएको बताए। ‘केही केही मान्छेहरुले भ्रम फिजाउने कोसिस गरेका छन्। अनावश्यक ढंगले विवाद खडा गर्न खोज्ने र समाजमा अशान्ति मच्चाउन खोज्ने नियोजित रुपमा कोशी प्रदेशको विरोध मात्रै गरेको छन्। त्यसैले जनतामा अन्योल सिर्जना गर्न खोजेका छन्’, ओलीले भने ।
