काठमाडौँ । राष्ट्रिय सहकारी महासंघले नेपाली फिल्म ‘छक्कापञ्जा ४’ को संवादप्रति आपत्ति जनाएको छ । फिल्मको संवादले सिंगो सहकारी अभियानमा दाग लगाउने काम भएको भन्दै सो संवाद हटाउन महासंघले माग गरेको हो ।
राष्ट्रिय सहकारी महासंघका अध्यक्ष मीनराज कडेलद्वारा जारी विज्ञप्तीमा उक्त संवादले समग्र सहकारीमाथिको अपमान गराएको जनाइएको छ । अध्यक्ष कडेलले चलचित्र विकास बोर्डलाई संवाद हटाउन पत्र समेत पठाएको जनाएका छन् ।
महासंघले पत्रमा लेखेको छ, ‘पछिल्लो समय आर्थिक संकुचनका कारण सबै क्षेत्रमा जस्तै सहकारीमा पनि समस्या परेको छ । यहि सन्दर्भलाई लिएर आमा सरस्वती मुभिजद्वारा निर्मित चलचित्र छक्का पञ्जा ४ मा सहकारी सम्बन्धी ‘लाञ्छनायुक्त एवम नारी अस्मितामा खलल पुग्ने संवाद रहेकोमा समग्र सहकारी अभियानको ध्यानाकर्षण भएको छ ।’
उक्त फिल्मको संवादमा, ‘श्रीमती भनेको बैंकको लोन हो । मेन्टेन गरेन भने घरबार लिलाम हुन्छ’, त्यसपछि महिला पात्र भन्छिन्, ‘अनि म चाँही के नि ?’ त्यसपछि पुरुष पात्रले जवाफ दिन्छ, ‘सहकारी भाग्न पनि सक्छ ।’ भन्ने थियो । यही संवादलाई लिएरसहकारी अभियानले आपत्ति जनाएका हुन् । फागुन १९ गतेदेखि प्रर्दशनमा आएको फिल्मले बक्सअफिसमा राम्रो कलेक्सन गरिरहेको छ । दुई सातासम्ममा फिल्मले १० करोड बढीको कमाई गरेको बताइएको छ ।
