काठमाडौँ । सप्तरीको राजविराजमा दिउँसै रक्सीले मातेर सडकमा ‘हंगामा’ गरेका प्रहरी जवान संजिवकुमार राय निलम्बनमा परेका छन् ।
शुक्रबार उनले रक्सी सेवन गरेर चेकजाँच गर्न थालेपछि स्थानीयले उनलाई प्रतिवाद गरेका थिए । प्रहरी जवान रायले राजविराजस्थित महेन्द्र विन्देश्वरी बहुमुखी क्याम्पस अगाडी सेवारी चेकजाँचको क्रममा विवाद गरेको र अर्धनग्न भई सडकमा दौडिरहेको भिडियो समाजिक सञ्जालमा सार्वजनिक भएको थियो ।
जिल्ला प्रहरी कार्यालय सप्तरीमा कार्यरत रायलाई सो घटना पश्चात निलम्बन गरी अनुसन्धान गरिरहेको जिल्ला प्रहरी कार्यालय सप्तरीका प्रवक्ता डीएसपी नरेशकुमार सिंहले जानकारी दिए ।
उनका अनुसार प्रहरीजवानसहित विवाद र दुर्व्यवहार गर्ने घटनामा संलग्न ६ जना व्यक्तिलाई समेत पक्राउ गरिएको छ । भिडियो फुटेजको आधारमा पहिचान गरी त्यस घटनामा संलग्न देखिएका अरुलाई पनि पक्राउ गरी अनुसन्धान थालिएको सिंहले बताए ।
