काठमाडौं । आईसीसी विश्वकप लिग–टू अन्तर्गतको त्रिकोणात्मक सिरिजमा यूएईविरुद्ध नेपाललाई पाँचौे सफलता मिलेको छ ।
दुबई अन्तराष्ट्रिय क्रिकेट स्टेडियममा भईरहेको खेलमा आरीफ शेखले नेपाललाई पाँचौे सफलता दिलाएका हुन् । उनले अलिशन शराफूलाई २ रनमा आउट गराए ।
स्पिनर सन्दीप लामिछानेले नेपाललाई चौथो सफलता दिलाएका थिए । सन्दीपले यूएईका असिफ खानलाई ७२ रनमा करण केसीको हातबाट क्याच गराएर आउट गरे । कुशल मल्लले रिजवानलाई २२ रनमा आउट गराएर नेपाललाई तेस्रो सफलता दिलाएका थिए ।
यस्तै, सन्दीपले नै यूएईका रित्य अरविन्दलाई १८ रनमा आउट गराएर नेपालको लागि दोस्रो विकेट लिएका थिए । सन्दीपको बल सार्प टर्न हुँदा अरविन्दको ब्याटमा छोएर कुशल भुर्तेलको हातमा थामिन पुग्यो ।
त्यसैगरी, तिब्र गतिका बलर करण केसीले नेपालको लागि पहिलो विकेट लिएका थिए । करणले यूएईका ओपनर मूहम्मद वसिमलाई आउट गराएका थिए ।
यो समाचार तयार पार्दासम्म यूएईले ३७ ओभरमा ५ विकेटको क्षतिमा १४२ रन बनाएको छ ।
