काठमाडौं । नेपाल क्रिकेट संघ (क्यान) ले यूएईमा हुने त्रिकोणात्मक सिरिजका लागि १५ सदस्सीय टिम घोषणा गरेको छ । जसमा राष्ट्रिय टिमका स्पिनर सन्दीप लामिछानेलाई समाबेश गरिएको छैन । तर, सन्दीप यूएई जाने सम्भावना भने समाप्त भईसकेको छैन ।
सर्वोच्च अदालतले सन्दीपमाथि लगाएको प्रतिबन्ध फुकुवा गरिदिए उनलाई टीममा समाबेश गरिने क्यानका म्यानेजर विनोद दासले बताए । खेलकुद परिषदबाट स्वीकृतिका लागि मात्र टीमको नाम पठाएको उनले बताए । ‘आज हामीले खेलकुद परिषदबाट स्वीकृतिका लागि १५ सदस्यको छनोट गरेर पठाएका हौं, तर यही नै अन्तिम टोली होइन’, दासले भने ।
क्यान अध्यक्ष चतुरबहादुर चन्दले यसअघि नै सर्वोच्चले प्रतिवन्ध हटाएको खण्डमा सन्दीपलाई टीममा समावेश गर्न सकिने प्रतिक्रिया दिएका थिए ।
सन्दीपले राष्ट्रिय टीमबाट विदेशमा खेल्न पाउनुपर्ने माग गर्दै उच्च अदालत पाटनले गरेको फैसलाविरुद्ध सर्वोच्च अदालतमा पुनरावेदन गरेका छन् । सन्दीपले गरेको पुनरावेदनमा भोलिलाई पेसी तोकिएको छ । भोलिको सुनवाइमा अदालतले उक्त रोक फुकुवा गरिदियो भने सन्दीप यूएई जान पाउछन्। नेपाली टोली शनिबार यूएई प्रस्थान गर्नेछन् ।
नेपालले आईसीसी विश्वकप लिग–२ अन्तर्गत फागुन १५ गतेदेखि २२ गतेसम्म यूएई र पपुवा न्युगिनीसँग शृङ्खला खेल्दैछ । एकदिवसीय मान्यता कायम राख्नका निम्ति नेपालको यो भ्रमण निर्णायक रहने भएकाले सन्दीपको उपस्थिति अत्यन्तै महत्वपूर्ण छ । उनकै उत्कृष्ट प्रदर्शनमा नेपालले घरेलु मैदानमा आयोजित त्रिकोणात्मक श्रृंखला क्लीन स्वीप गरेको थियो । सन्दीपले मात्रै उक्त चार खेलमा १३ विकेट लिएका थिए ।
क्यानले घोषणा गरेको नेपाली टोली:
रोहित पौडेल, कुशल भुर्तेल, आसिफ शेख, ज्ञानेन्द्र मल्ल, कुशल मल्ल, दीपेन्द्र सिंह ऐरी, सन्दीप जोरा, सोमपाल कामी, करण केसी, ललित राजवंशी, गुलशन झा, भिम सार्की, आरिफ शेख, प्रतिश जी।सी र श्याम(मौसम) ढकाल
