काठमाडौँ । आईसीसी विश्वकप क्रिकेट लिग–२ को त्रिकोणात्मक एकदिवसीय सिरिजअन्तर्गत स्कटल्याण्डले नामिबियालाई पराजित गरेको छ ।
सोमबार कीर्तिपुरस्थित टियु मैदानमा सम्पन्न खेलमा नामिबिया स्कटल्याण्डसँग ४३ रनले पराजित भएको हो । २२२ रनको विजयी लक्ष्य पछ्याएको नामिबियाले ३८.४ ओभरमा अलआउट हुँदै १७८ रनमात्र जोड्न सक्यो ।
नामिबियाका लो हन्ड्रे लरेन्सले ६७ बलमा ५२ रनको अर्धशतकीय इनिङ्स खेले । यस्तै, कप्तान जेरहार्ड इरासमसलृे ३८ बलमा ४३ रन बनाए । जेन ग्रीनले ४० बलमा २५ रन बनाउँदा साउन फोचे र रुवेन ट्रम्पलेमनले १०/१० रन जोडे । अन्य ब्याट्सम्यानले दाहोरो अंक जोड्न सकेनन् ।
स्कटल्याण्डका मार्क वाटले ४ विकेट लिँदा, माइकल लिस्कले ३ तथा ब्रान्डन एमसीमुलेनले २ विकेट लिए भने क्रिस ग्रिभ्सको नाममा एक विकेट रह्यो ।
त्यसअघि टस हारेर ब्याटिङमा उत्रिएको स्कटल्याण्डले ४८.४ ओभरमा अलआउट हुँदै २२१ रन बनाएको थियो । स्कटल्याण्डका लागि ओपनर केयल कोइटजेर डकआउट हुँदा, लियम नेयलरले २० रन जोडे । यस्तै, क्रिस्टोफर म्याकब्रिज सर्वाधिक ४७ रन बनाएर पभेलियन फर्किए । ७५ बल खेलेका उनले ७ चौका प्रहार गरे । कप्तान रिची बेरिङटन ३२ रनमा आउट हुँदा म्याथ्यू क्रसले १६ रन जोडे ।
यसैगरी, थोमस म्याकिन्टोस ३४ रन, मिचेल लिस्क २९ रन, क्रिस ग्रेभिस १४ र मार्क वाटले १० रन जोडे । नामिबियाका लागि ट्रम्पलेमनले ९.४ ओभरमा ३० रन खर्चेर सर्वाधिक ५ विकेट लिए । ताङगेनी लुङगामेनीले २ विकेट लिँदा बर्नाद स्कोस्ज, बेन शिकोङ्गो र पिंकी या फ्रान्सका नाममा एक/एक विकेट रह्यो ।
सात टोली सहभागी विश्वकप लिग २ मा स्कटल्याण्ड ३५ खेलमा २४ मा जित र ९ मा हारका साथ ५० अंकका साथ शीर्ष स्थानमा छ । यता, नामिबिया भने ३४ खेलमा १८ मा जित र १५ मा हारका साथ ३७ अंकका साथ तेस्रो स्थानमा छ ।
नामिबियालाई नेपालमा भएको खेल सुखद रहेन । पहिलो खेलमा नामिबिया घरेलु टोली नेपालसँग,दोस्रो खेलमा स्कटल्याण्डसँग तथा तेस्रो खेलमा घरेलु टोली नेपासँग नै पराजित भएको थियो ।
शृंखलाको चारै खेलमा पराजित भएपछि नामिबियालाई शीर्ष तीनमा रहेर विश्वकप छनोट खेल्ने समिकरण कठिन बनेको छ । यता, नामिबियाको पराजयले नेपाललाई भने बाँकी ९ खेल जितेको खण्डमा शीर्ष तीनमा रहेर विश्वकप छनोट खेल्ने समिकरणमा सहज बनेको छ ।
