काठमाडौँ । नेपाल सरकारका अर्थमन्त्री एवं नेकपा एमालेका उपाध्यक्ष विष्णु प्रसाद पौडेल धनगढी पुग्नुभएको छ । आज शुक्रबारबाट सुरु हुन लागेको एमालेको ‘मिसन ग्रासरुट’ अभियानको सुरुवात गर्नका लागि उहाँ धनगढी पुग्नुभएको हो ।
धनगढी पुगेलगत्तै शिवपुरी धामको दर्शन गरेर उपाध्यक्ष पौडेलले भन्सार र कर कार्यालयको अनुगमनपछि पार्टीको मिसन ग्रासरुट कार्यक्रमको उद्घाटन गर्नुहुनेछ ।
सुदूरपश्चिम प्रदेशमा पनि आजबाट ‘मिसन ग्रासरुट’ सुरु हुँदैछ । सुदूरपश्चिममा उपाध्यक्ष पौडेललाई अनुगमन र सचिव तथा प्रदेश इन्चार्ज लेखराज भट्टलाई फिल्ड कमान्डर तोकिएको छ ।
आज धनगढीमा सुरु हुने अभियानमा एमालेका केन्द्रीय सदस्य, केन्द्रीय निकायका सबै प्रदेश सचिवालय जिल्लाका पदाधिकारी र जनसङ्गठनका प्रदेश अध्यक्ष र इन्चार्जको उपस्थिति रहनेछ ।
केन्द्रीय नेताबाट प्रशिक्षित भएपछि यहाँ प्रशिक्षण दिएका नेताहरूले यहाँका सबै पालिकामा सो अभियान सुरु गर्नेछन् ।
एमाले अध्यक्ष केपी शर्मा ओलीले आजै पार्टी मुख्यालय च्यासलबाट सात प्रदेश र गैरभूगोलका विशेष प्रदेशमा आयोजना हुने अभिमुखीकरण कार्यक्रमलाई भर्चुअलमाध्यमबाट सम्बोधन गरी देशभर पार्टी सुदृढीकरण अभियान शुभारम्भ गर्नुहुने छ । अध्यक्ष ओली समग्र अभियानको संयोजक हुनुहुन्छ ।
पार्टीका पोलिटव्यूरो र केन्द्रीय कमिटी सदस्यहरूलाई अभियानको केन्द्रीय प्रतिनिधिका रूपमा पालिका तहमा दुईमहिनाको जिम्मेवारी दिएर अभियान सञ्चालन गर्न लागिएको छ भने उपाध्यक्षदेखि स्थायी कमिटीसम्मका नेताहरूको टिमले अभियानको अनुगमन र संयोजन गर्नेछन् ।
