काठमाडौँ । राष्ट्रिय प्रजातन्त्र पार्टी (राप्रपा) का अध्यक्ष एवं उपप्रधानमन्त्री राजेन्द्र लिङ्देनले भावी राष्ट्रपतिको विषयमा सत्ता गठबन्धन दलहरुमा कुनै असमझदारी नभएको बताउनुभएको छ ।
नेकपा (एमाले) का अध्यक्ष केपी शर्मा ओली नेतृत्वको उच्चस्तरी राजनीतिक संयन्त्रको बैठकपछि पत्रकारहरुसँग कुराकानी गर्दै अध्यक्ष लिङ्देनले यसअघि भएको सहमतिमा सत्ता साझेदार दलहरुबीच कुनै विमति नरहेको बताउनुभयो । बाहिर आएका कुराहरु भ्रमपूर्ण रहेको उहाँको भनाइ थियो ।
उहाँका अनुसार बैठकमा सरकारका कामकारवाहीको समीक्षा हुनुका साथै गठबन्धनको सहकार्यलाई निरन्तरता दिने समझदारी भएको छ ।
उहाँले बैठकमा भावी राष्ट्रपतिको निर्वाचनबारे कुनै छलफल नभएको बताउनुभयो । उहाँले राष्ट्रिय स्वतन्त्र पार्टी (रास्वपा) लाई सरकारमा फर्काउने विषयमा भन्नुभयो, “केही प्राविधिक विषयहरु मिलाउनुपर्ने छ, रास्वपा चाँडै सरकारमा आउन सक्छ ।”
