एजेन्सी । स्पेनिस फुटबल लिग ला लिगा अन्तर्गत बार्सिलोनाले सहज जित निकालेको छ ।
आइतबार राति सम्पन्न खेलमा बार्सिलोनाले सेभियालाई ३–० गोलले पराजित गरेको हो । घरेलु मैदानमा बार्सिलोनालाई जित दिलाउन जोर्डी अल्बा, गावी र राफिन्हाले गोल गरे । तीनै गोल दोस्रो हाफमा सम्भव भएको थियो ।
खेलको ५८ औं मिनेटमा अल्बाले गोल गर्दै बार्सिलोनालाई सुरुवाती अग्रता दिलाए । उनलाई फ्रांक केसिले पास उपलब्ध गराएका थिए । यस्तै, ७० औं मिनेटमा गावीले गोल गर्दै घरेलु टोलीको अग्रता दोब्बर पारे । उनलाई राफिन्हाले पास उपलब्ध गराए ।
यस्तै ७९ औं मिनेटमा राफिन्हाले गोल गर्दै बार्सिलोनाको जित सुनिश्चित गरे । उनलाई अल्बाले पास उपलब्ध गराएका थिए ।
जितसँगै बार्सिलोनाले २० खेलबाट ५३ अंक जोडेको छ । शीर्षस्थानको बार्सिलोना दोस्रो स्थानको रियल मड्रिडभन्दा ८ अंकले अगाडी छ । यता समान खेलबाट २१ अंकसहित सेभिया भने १६ औं स्थानमा छ ।
