काठमाडौं । आगामी फागुन १९ गतेबाट सुरु हुन गइरहेको सहिद स्मारक ‘ए’ डिभिजन लिग फुटबल प्रतियोगिताको ५० प्रतिशत तयारी पूरा भएको छ ।
अखिल नेपाल फुटबल संघ (एन्फा) ले शुक्रबार पत्रकार सम्मेलनको आयोजना गर्दै लिगको ५० प्रतिशत तयारी पूरा भएको जानकारी दिएको हो ।
पत्रकार सम्मेलनमा बोल्दै एन्फाका महासचिव किरण राईले लिगको ५० प्रतिशत तयारी सकिएको बताए । तीन मैदानमा आयोजना हुने शीर्ष डिभिजनको लिग डबल राउण्ड रोबिनको आधारमा दशरथ रंगशाला, एन्फा कम्प्लेक्स र च्यासल मैदानमा हुनेछ ।
लिगका लागि १४ वटै क्लबले नाम दर्ता गराईसकेको एन्फाले जनाएको छ । एन्फाका अनुसार सबै क्लबले तयारी खर्चको पहिलो किस्ता १५ लाख लिइसकेका छन् ।
एन्फाले लिगको तयारीस्वरुप ‘ए’ डिभिजनका प्रत्येक क्लबलाई ३२ लाख ५० हजार रुपैयाँ उपलब्ध गराउने छ ।
उन्फाका अनुसार यस पटकको लिग विजेताले ७५ लाख, दोस्रोले ५० लाख र तेस्रो हुने टोलीले २५ लाख रुपैयाँ पाउनेछन् । फेयर प्ले अवार्डको नगद पुरस्कार ३ लाख पुर्याइएको छ ।
प्रतियोगिताको सर्वोत्कृष्ट खेलाडीले ३ लाख, सर्वाधिक गोलकर्ता र सर्वोत्कृष्ट गोलकिपरले २ लाख तथा इमर्जिङ प्लेयरले १ लाख ५० हजार रुपैयाँ पाउनेछन् ।
प्रत्येक खेलको विजेता क्लबलाई म्याच मनीवापत ५० हजार रुपैयाँ प्रदान गरिने तथा बराबरी भएको खण्डमा दुई क्लबबीच रकम बराबर बाँडिने एन्फाले जनाएको छ । यस्तै, हरेक खेलको उत्कृष्ट खेलाडीले प्लेयर अफ द म्याचस्वरुप १० हजार रुपैयाँ पाउनेछन् ।
