काठमाडौँ । राष्ट्रिय स्वतन्त्र पार्टी (रास्वपा) ले पार्टीको चितवन जिल्ला सभापति धर्मेन्द्र सापकोटाले सञ्चारमाध्यममा अन्तरवार्तामार्फत दिएको सूचना असत्य तथा भ्रमपूर्ण रहेको जनाएको छ ।
पार्टी प्रवक्ता एवं महामन्त्री डा मुकुल ढकालले एक विज्ञप्ति जारी गर्दै सापकोटाले प्रतिनिधिसभा सदस्य निर्वाचनदेखि नै पार्टीलाई असहयोग गर्दै आउनुभएको, निर्वाचन अभियानमा सहभागी नहुनुभएको जस्ता गतिविधि गरेको बताउनुभयो ।
उहाँले पार्टीको विधानबमोजिमका हैसियतभन्दा बाहिरका गतिविधिको नेतृत्वसमेत गरेकाले गत पुस १७ गते सापकोटालाई स्पष्टीकरण सोधिएको र त्यस्ता कुनै गतिविधि र कार्यमा संलग्न नहुन निर्देशन दिइएको उल्लेख गर्नुभएको छ ।
सापकोटाले स्पष्टीकरण दिएपछि सो विषया पार्टीले निर्णय गर्नुअघि नै यही माघ ८ गते पार्टीबाट राजीनामा दिएको र पार्टीको केन्द्रीय समितिको बैठकले राजीनामा स्वीकृत गरेको विज्ञप्तिमा उल्लेख छ ।
