काठमाडौँ । नेपाली कांग्रेसका प्रभावशाली नेता तथा सांसद डा. चन्द्रकान्त भण्डारीले नेपालको राजनीति र नेपाली नेताहरुको चिन्तनमा अत्यन्त बच्पना रहेको टिप्पणी गरेका छन् ।
आफूहरुले जेल र यातना सहेर बहुदल ल्याएको ३२ वर्ष भइसक्दा पनि नेताहरुको सत्ताको मानसिकता र आन्तिरिक द्धन्द्धका कारण मुलूकलाई नराम्रो असर पारेको उनको आरोप छ ।
आज (सोमबार) रिपोर्टर्स क्लब नेपालको आयोजनामा ‘राष्ट्रपति र उपराष्ट्रपतिको निर्वाचन, र समसामयिक राजनीतिक विषयमा विभिन्न दलका नेताहरुसँग भएको साक्षात्कार’ कार्यक्रमलाई सम्बोधन गर्दै उनले भने ‘नेपाली राजनीतिमा नेताहरुको चिन्तन अत्यन्तै बचपन छ । यसरी मुलूक बन्दैन । ३२ वर्ष भयो हामीले बहुदल ल्याएको । हामी जेल बसेको, यातना खाएको यो मूलुक रुपान्तरण गरौंला भन्ने थियो । जहिलेसुकै सत्ताको कुरा र द्धन्द्धको कुरा यसले मुलूकलाई डुबायो ।,’
विगतका सोचाई बोकेर अझै हिडिरहे अर्को ३२ वर्षमा पनि यो मुलूक नबन्ने उनको दाबी छ । साथै, मनमोहन प्रधानमन्त्री हुँदापनि आफूहरुले विश्वासको मत दिएको स्मरण गर्दै उनले त्यसबेला मनमोहनलाई समर्थन नगर्दा मध्यावधि निर्वाचनमा जानुपर्ने भएको र मुलूकको धेरै खर्च हुने भएकाले समर्थन गरेको बताए ।
‘हामीले मनमोहनजी प्रधानमन्त्री हुँदा समर्थन गर्यौं । मुलूकको धेरै खर्च हुने भयो । मध्यावधि निर्वाचनमा जाने भयो भनेर समर्थन गर्यौं,’ उनले विगत स्मरण गराए ।
प्रधानमन्त्री प्रचण्डलाई विश्वासको मत दिएर कांग्रेस प्रतिपक्षमा बस्न नमिल्ने भन्ने अहिलेको बहसलाई लक्षित गर्दै उनले दीर्घकालीन सोचका आधारमा यो निर्णयमा कांग्रेस पुगेको र संसारका दर्शन र सिद्धान्त सधैंका लागि नहुने बताए । माओवादीसँगको गठबन्धनमा निर्वाचनमा जाँदै गर्दा जनतासँग गरेको वाचा पुरा गर्न कांग्रेसले प्रचण्डलाई विश्वासको मत दिएको उनको भनाई छ ।
प्रचण्डलाई प्रधानमन्त्री बनाउन नसक्नु कांग्रेसको गल्ती भएको उनको स्विकारोक्ति थियो । अहिलेको सरकारलाई खिचडी सरकारको संज्ञा दिँदै उनले यस विषयमा धेरै विवाद गर्न आवश्यक नरहेको बताए ।
प्रधानमन्त्री पुष्पकमल दाहाल ‘प्रचण्ड’ गतिशील नेता भएको उल्लेख गर्दै नेता भण्डारीले अहिलेको सत्ता गठबन्धन पनि धेरै समय नटिक्ने ठोकुवा गरे । उनले प्रचण्ड जतापनि टर्न लिनसक्ने नेता भएको चित्रण गरे ।
साथै, राष्ट्रिय स्वतन्त्र पार्टीका सभापति रबि लामिछाने आगामी पाँच वर्ष सरकारमा जानु गल्ती भएको उनको दाबी छ । रबिप्रति जनताको आकर्षण देखेर आफू लोभिएको उनको भनाई छ । आफूले निर्वाचनमा रबिसँग प्रतिस्पर्धा चाहेको पनि भण्डारीले बताए ।
प्रतिस्पर्धाबाट नै लोकतन्त्र मौलाउने उनको भनाई छ । रबि लामिछाने गैरसांसदको रुपमा मन्त्री बन्ने कि नबन्ने भन्ने उनको इच्चा भएको भण्डारीको टिप्पणी छ । आफ्नो पार्टी सत्तामा आफ्नो नेतृत्वमा जाने नभए प्रतिपक्षमा बसेर जनताको मुद्धा उठाउने उनले बताए । उनले आफूहरुले राष्ट्रपतिको उम्मेदवार बनाउने पनि घोषणा गरे ।
