काठमाडौंः आइसिसी टी–२० विश्वकप क्रिकेट छनौट अन्तर्गत ओमान विरुद्धको खेलमा नेपालले ओमानलाई जितका लागि ११८ रनको मध्यम चुनौती दिएको छ ।
इएसपिएनका अनुसार, ओमानको अल अमिरात खेल मैदानमा जारी खेलमा नेपालले निर्धारित २० ओभरमा आठ विकेट गुमाएर ११७ रन बनाएको थियो ।
नेपालका लागि आरिफ सेखले ३८, लोकेश बमले १६, कप्तान सन्दिप लामिछानेले १६ तथा ज्ञानेन्द्र मल्लले १५ रन बनाएका थिए । अन्य खेलाडीहरु कुशल भुर्तेलले ५, आसिफ सेखले ४, दिपेन्द्र सिंह ऐरीले ११, बिबेक यादवले ७, कमल ऐरीले १ रन बनाएर आउट भएका थिए ।
नेपालले स्कोरबोर्डमा ६ रन हुँदा आसिफ सेखलाई गुमाएको थियो भने १२ रनमा कुशल भुर्तेल, ३३ रन हुँदा ज्ञानेन्द्र मल्ल, ४० रन हुँदा दिपेन्द्र सिंह ऐरीलाई गुमाएर शुरु देखि नै नेपाली टिम दबाबमा परेको थियो ।
ओमानका लागि खबार अलिले ३ र बिलाल खानले २ विकेट लिएका थिए ।
जवाफमा ब्याटिङ गरिरहेको ओमान पनि नेपाली बलरहरु सामु खुलेर खेल्न सकेको छैन । ओमानले पाँच ओभरभित्रै ३ विकेट गुमाइसकेको छ ।
यो समाचार तयार पार्दासम्म ६.३ ओभरमा ४ विकेट गुमाएर ३१ रन बनाएको छ ।
नेपाली बलर जितेन्द्र मुखियाले १, कमल ऐरीले १ तथा कप्तान सन्दीप लामिछानेले १ विकेट लिएका थिए । एक विकेट रन आउटका रुपमा प्राप्त भएको थियो ।
