काठमाडौँ । सिस्टममा समस्या आएको भन्दै परराष्ट्र मन्त्रालयले राहदानी वितरण अवरुद्ध भएको जनाएको छ । राहदानी लिनका लागि भीड बढिरहेको बेला पुस १७ गतेदेखि राहदानी विभागको सिस्टममा समस्या आएको मन्त्रालायको भनाइ छ ।
सिस्टममा समस्या हुँदा राहदानी आवेदनको स्टाटस हेर्ने तथा राहदानी वितरण कार्य अवरुद्ध भएको राहदानी विभागका निर्देशक एवं प्रवक्ता दुरपदा सापकोटाले बताउनुभएको छ ।
समस्या समाधानका लागि निरन्तर कार्य गरिरहेको र सिस्टम पूर्णरुपमा सुचारु हुन केही समय लाग्ने विभागले सूचना प्रकाशित गरी जनाएको छ । “आजको मितिदेखि अर्को सूचना जारी नहुँदासम्मका लागि माथि उल्लेखित सेवा लिनको लागि विभागमा उपस्थित नभइदिनु हुन सादर अनुरोध छ । यसबाट सेवाग्राहीमा पर्न जाने असुविधाप्रति राहदानी विभाग क्षमाप्रार्थी छ ।”
साथै, नियमितरूपमा राहदानी आवेदनका लागि (अप्वाइन्टमेन्ट डेट) बुक गरेका सेवाग्राहीहरूलाई बुक गरेको मितिमा बायोमेट्रिकका लागि विभागमा उपस्थित हुन पनि विभागले आग्रह गरेको छ ।
