काठमाडौँ । उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठले एकान्तकुनामा रहेको यातायात कार्यालयको अनुगमन गर्नुभएको छ ।
मंगलबार मन्त्री श्रेष्ठले कार्यालय समय सुरु हुनासाथ एकान्तकुना पुगेर छिटो र झन्झटरहित ढंगले सेवा प्रवाहका लागि कर्मचारीलाई निर्देशन दिनुभयो ।
उहाँले सेवाग्राहीहरुसँग समेत पाइरहेको सेवा र गुनासोबारे जिज्ञासा राख्नुभएको थियो । सवारी चालक अनुमतिपत्रका लागि भइरहेको लिखित र ट्रायल परीक्षाको समेत उहाँले निरीक्षण गर्नुभएको थियो ।
मन्त्री श्रेष्ठले पदभार ग्रहण गरेलगत्तै भ्रष्टाचारको प्रभावकारी नियन्त्रण गरिने र अनियमिततालाई कडाइका साथ रोक्ने आफ्नो पहिलो कर्तव्य भएको बताउनुभएको थियो । भनसुन र घुस नखाई काम गर्ने वातावरण बनाउनेसमेत उहाँले प्रतिबद्धता व्यक्त गर्नुभएको थियो ।
