एजेन्सी । दिवंगत बलिउड अभिनेता सुशान्त सिंह राजपूतको मृत्युको मामलामा कूपर अस्पतालका पोस्टमार्टम स्टाफले अर्को चकित पार्ने दाबी गरेका छन् ।
सुशान्तको शव पोस्टमार्टमका लागि ल्याइँदा उनको आँखामा उनलाई कसैले धेरै पटक मुक्का हानेको जस्तो निशान देखिएको उनले बताए । यस्तै, उनले महाराष्ट्रको अघिल्लो सरकार अर्थात् उद्धव सरकारमाथि पनि प्रश्न उठाएका छन् ।
उनले भने – ‘म सुशान्तको शवको पोस्टमार्टम गर्ने टोलीको हिस्सा थिएँ र मैले उनलाई धेरै चोट लागेको देखेँ, उनको धेरै हड्डीहरू पनि भाँचिएको थियो । त्यतिबेलाको उद्धव सरकारलाई विश्वास नभएकाले म मिडियाको अगाडि आउन सकिन । अहिले सरकार परिवर्तन भएको छ, म सत्य बोल्न चाहन्छु । मलाई आफ्नो ज्यानको परवाह छैन, सुशान्तले न्याय पाउनुपर्छ ।’
रुपकुमार शाह सोमबार २६ डिसेम्बरमा पहिलो पटक मिडियामा देखा परेका थिए । शाहले सुशान्तले आत्महत्या नगरेको, हत्या भएको दाबी गरेका छन् ।
सुशान्त सिंह राजपूत १४ जुन, २०२० मा बान्द्रा स्थित उनको घरमा रहस्यमय रूपमा मृत फेला परेका थिए । पहिलो नजरमा यो घटना आत्महत्या भएको देखिए पनि पछि मिडिया र विपक्षी दलको दबाबका कारण घटनाको अनुसन्धान सीबीआईलाई सुम्पिएको थियो । सीबीआईको पछिल्लो प्रतिवेदनमा मृत्युको वास्तविक कारण आत्महत्या भनिएको थियो ।
