काठमाडौं । राजधानीमा जारी रहेको पहिलो संस्करणको नेपाल टी-ट्वान्टी लिगमा पोखरा एभेन्जर्सलाई लुम्बिनी अल स्टारले पराजित गरेको छ ।
किर्तिपुर टियु मैदानमा भएको खेलमा १ सय ३४ रनको लक्ष्य पाएको लुम्बिनीले अन्तिम बलमा ७ विकेट गुमाएर लक्ष्य भेट्यो ।
लुम्बिनीका लागि कुशल भुर्तेल सर्वाधिक ३९ रन बनाए । शाडले क्लाउड वैन शाल्कविकले अविजित ३१ तथा उन्मुक्त चन्दले २२ रन बनाए । यस्तै अनिल शाहले १९ रन जोडे भने गुलसन झा १० रनमा आउट भए ।
पोखराका लागि विपिन खत्री र कुशल मल्लले समान २/२ विकेट लिए । प्रतिश जिशी,अभिमन्यु मिथुन र जाहिर खानले समान १/१ विकेट लिए ।
पहिले ब्याटिङ गरेको पोखराले २० ओभरमा ९ विकेट गुमाएर १ सय ३३ रन बनाएको थियो । पोखराको लागि कुशल मल्लले ३१ बलमा ५ चौका र ५ छक्काको सहयोगमा ६१ रनको बिष्फोटक ईनिङ खेले । यस्तै, उपुल थरंगाले ४२ रन जोड्दा अन्यले दोहारो अंकमा रन बनाउन सकेनन् ।
लुम्बिनीका लागि शाडले क्लाउड वैन शाल्कविकले ३ विकेट लिए भने किशोर महतो र गुलसन झाले समान २/२ विकेट लिए ।
लगातार तेस्रो जित हात पारेको लुम्बिनी ३ खेलमा ६ अंकका साथ अंक तालिकाको शीर्ष स्थानमा रहेको छ भने पोखरा ३ खेलमा अंक तालिकाको पुछारमा रहेको छ ।
यस प्रतियोगिताको फाईनल खेल पौष २७ गते हुनेछ ।
