एजेन्सी । इंग्लिस प्रिमियर लिग फुटबल अन्तर्गत आर्सनलले सहज जित निकालेको छ । भर्खरै सम्पन्न खेलमा ‘लिग लिडर’ आर्सनलले वेस्ट हाम युनाइटेडलाई ३–१ गोलले पराजित गरेको हो ।
आर्सनललाई घरेलु मैदानमा जित दिलाउन बुकायो साका, गाब्रियल मार्टीनेली र एड्डी केटियाहले गोल गरे । वेस्ट हामका सइद बेनरामाले एक गोल गरे ।
खेलको २७ औं मिनेटमा बेनरामाले पेनाल्टीमार्फत गोल गर्दै वेस्ट हामलाई सुरुवाती अग्रता दिलाएका थिए । आर्सनलका डिफेन्डर विलियम सालिवाले वेस्ट हामका बोइनलाई डी–बक्सभित्र लडाएपछि वेस्ट हामले पेनाल्टी पाएको थियो ।
दोस्रो हाफमा आर्सनल खेलमा फर्कियो । ५३ औं मिनेटमा साकाले गोल गर्दै आर्सनललाई १–१ को बराबरीमा ल्याए । मार्टिन ओडेगार्डले उपलब्ध गराएको पासलाई सदुपयोग गर्दै उनले सुन्दर गोल गरे ।
यस्तै, ५९ औं मिनेटमा मार्टिनेलीले गोल गर्दै आर्सनललाई २–१ को अग्रता दिलाए । उनलाई ग्रानिट जाकाले पास उपलब्ध गराए । ६९ औं मिनेटमा केटियाहले गोल गर्दै आर्सनललाई ३–१ को जित दिलाए । उनलाई ओडेगार्ड पास उपलब्ध गराए ।
जितसँगै १५ खेलबाट ४० अंकसहित आर्सनल अंकतालिकाको शीर्ष स्थानमा कायम छ । पराजित वेस्ट हाम १६ खेलबाट १४ अंकसहित १६ औं स्थानमा छ ।
