काठमाडौँ । कुनैबेला सामाजिक सञ्जाल र युट्युबमा निक्कै नै चर्चामा रहेको नाम हो सचिन परियार । नेपाली लोकदोहोरीदेखि टेलिसिरियलसम्म उनलाई प्रयोग गराइएको थियो ।
एकाएक सामाजिक सञ्जालबाट हराएका सचिन अहिले सिकिस्त बिरामी रहेको खबर सार्वजनिक भएको छ । उनको अहिले काठमाडौंस्थित त्रिवि शिक्षण अस्पतालमा उपचार भइरहेको छ ।
सचिनको उपचारमा आर्थिक समस्या रहेको जानकारी पाउनासाथ इसा फाउण्डेसन मार्फत २० हजार आर्थिक सहयोग गरेको फाउन्डेसनका सचिव कमल सरगमले सामाजिक सञ्जालमार्फत जानकारी दिएका छन् । उनले थप आर्थिक सहयोगको आवस्यकता रहेको उल्लेख गर्दै सहयोगका लागि आग्रह समेत गरेका छन् ।
गुल्मीका सचिन केही समय सामाजिक सञ्जालमा हिट भए । उनलाई म्युजिक भिडियोदेखि टेलिफिल्ममा खेलाउनेको ताँती नै लाग्यो ।
पहिलोपटक गुल्मीबाटै एक युट्युब च्यानलमा अन्तर्वार्ता दिएका सचिन युट्युबमा मात्रै नभई ‘टिकटक’मा पनि चर्चित बने ।
उनै सचिन अहिले अस्पतालको बेडमा भेटिएका छन् । बोल्न समेत नसक्ने अवस्थामा छोराको उपचार गराईरहेकी सचिनकी आमाले आर्थिक संकट परेको बताएकी छिन् ।
सचिन बिरामी भएको थाहा पाएपछि गायक रविन लामिछाने उनको थप उपचार खर्च अभावका कारण रोकिन सक्ने खतरा भएको भन्दै सकेको सहयोग गर्न सबैलाई आग्रह समेत गरेका छन् ।
