एजेन्सी । भारतको राजधानी दिल्लीमा बुधबार १७ वर्षीया युवतीमाथि एसिड प्रहार भएको छ । घटना बिहान ७ः३० बजे द्वारका क्षेत्रमा भएको हो ।
युवती आफ्नी कान्छी बहिनीसँग जाँदै गर्दा मोटरसाइकलमा दुई जना आए । पछाडि बसेका केटाले एसिड प्रहार गरे । घटनाको जानकारी प्रहरीलाई बिहान ९ बजे भएको थियो । प्रहरीले एक जनालाई नियन्त्रणमा लिएको छ ।
किशोरीलाई सफदरजंग अस्पतालमा रिफर गरिएको छ । उनले आफ्नो पहिचानमा रहेका २ जनामा शंका व्यक्त गरेकी छन् ।
छोरीको अवस्था गम्भीर रहेको किशोरीका बाबुले सञ्चारमाध्यमलाई बताए । उनले भने, ‘आज बिहान मेरा छोरीहरु सँगै बाहिर गएका थिए । कान्छी छोरी दौडिएर घर भाग्दै आइन् र २ जना केटाले दिदीमाथि एसिड खन्याएर गएको बताइन् । अहिले उनको दुवै आँखामा एसिड परेको छ ।’
एक युवकलाई सोधपुछका लागि हिरासतमा राखिएको छ । अनुसन्धानका क्रममा अर्का एक जना मुख्य संदिग्धका रूपमा देखा परेका छन् र आरोपितलाई पक्राउ गर्न विभिन्न टोली गठन गरिएको छ । सबै कोणबाट अनुसन्धान भइरहेको प्रहरीले जनाएको छ ।
