काठमाडौं । नेपाल उद्योग बाणिज्य महासंघका वरिष्ठ उपाध्यक्ष चन्द्रप्रसाद ढकालले अर्थतन्त्रबारे सबै दलहरुबीच साझा धारणा र सहमति आवश्यक रहेको बताउनु भएको छ ।
नेपाल आर्थिक पत्रकार संघ (नाफिज) को १३औँ बार्षिक साधारणसभा तथा छैठौ महासभाको उद्घाटन सत्रलाई सम्बोधन गर्दे उपाध्यक्ष ढकालले अर्थतन्त्रबारे सबै दलहरुबीच साझा दृष्टिकोण आवश्यक रहेको बताउनु भयो । उहाँले भन्नुभयो ‘कोरोना अघि नै हामी ठूलो संकटमा थियौं भने कोरोनापछिको अवस्थाबारे त भनिरहनै परेन । आम निर्वाचन भएर नयाँ सरकार बन्ने क्रममा छ अर्थतन्त्रबारे सबै दलहरुबीच साझा धारा र सहमतिको दस्तावेज जारी गरेर कुन बिन्दुबाट कसरी सुधार अघि बढाउने भन्नेमा निजी क्षेत्रलाई सँगै राखेर कार्ययोजना बनाऔं ।’
बरिष्ठ उपाध्यक्ष ढकालले भन्नुभयो ‘यस्तो कार्ययोजना बनाऔं कि जुन कार्यान्वयनको पनि ग्यारेन्टी होस् । टाइमलाइन राखौं । हामी सबै निजी क्षेत्र यसका लागि तयार छौं र अग्रसरताका लागि अब बन्ने नयाँ सरकार समक्ष पनि आग्रह गर्दछौं ।’
राजनीतिक नभै नेपालको एजेण्डा अब आर्थिक समृद्धि हुनु पर्ने कुरा स्मरण गराउदै उहाँले भन्नुभयो ‘अबको यो एजेण्डा स्थापित गर्न आर्थिक पत्रकारहरुको भूमिका महत्वपूर्ण हुन्छ र यसमा नेपाल आर्थिक पत्रकार संघ (नाफिज) जस्तो संस्थाको अझ विशेष महत्व हुने देखिन्छ ।’ उहाँले अर्थतन्त्रका समाचारले प्राथामिकता पाउन थालेको उल्लेख गर्दै हिजो अखबारको भित्री पेजमा अर्थका समाचार कतै छ कि भनेर खोज्नुपर्ने अवस्थाबाट अहिले पहिलो पानामै ठूला समाचार प्राथमिकताका साथ छापिइरहेका स्मरण गर्नुभयो । आर्थिक समाचारलाई केन्द्रका राखेर अनलाइनहरू सञ्चालन हुनु सुखद भएको भन्दै उहाँले तथ्यगत र त्रुटीरहित बनाउन संञ्चारकर्मीहरुलाई आग्रह गर्नुभयो । उहाँले आर्थिक पत्रकार संघलाई सरकार र निजी क्षेत्रलाई जोड्ने पुलको काम गर्न पनि सुझाब दिनुभयो ।
निजी क्षेत्रको आवाज सरकारसमक्ष पुर्याउने तथा सरकारका नीति नियमहरुका अस्पष्टताका सम्बन्धमा स्पष्ट पार्नेगरी हामी निजी क्षेत्रलाई बुझाउने काममा यहाँहरुको अग्रसरताको अपेक्षा हामीले गरेका छौ ढकालले भन्नुभयो । निजी क्षेत्रलाई फस्टाउनै नदिने सरकारका कतिपय नीति नियम र काम कारबाहीका सम्बन्धमा आलोचनात्मक चेत राख्न पनि आर्थिक पत्रकारहरुसंग उहाँले आग्रह गर्नुभयो ।
