एजेन्सी । कतारमा जारी फिफा विश्वकप फुटबलमा आज शुक्रबारदेखि शीर्ष ८ टोलीबीच सेमिफाइनल प्रवेशका लागि भिडन्त हुँदैछ । ३२ राष्ट्रले सहभागिता जनाएको यस विश्वकपमा अब ८ देशमात्र उपाधिका लागि दौडमा छन् ।
जसमा ब्राजिल, क्रोएसिया, नेदरल्यान्ड्स, अर्जेन्टिना, मोरक्को, पोर्चुगल, इंग्ल्याण्ड र फ्रान्स रहेका छन् ।
९२ वर्ष पुरानो प्रतियोगिताको चालू सिजनको क्वाटरफाइनलमा ४ टोलीले विश्वकपको उपाधि जित्न सफल भएका छन् । बाँकी ४ ले एकपटक पनि उपाधि उचाल्ने मौका पाएका छैनन् । ब्राजिलले ५ उपाधि जितेको छ भने अर्जेन्टिना र फ्रान्सले २ उपाधि जितेका छन् । जबकि इंग्ल्याण्डले एक उपाधि जितेको छ ।
ब्राजिल भर्सेस क्रोएसिया – राति ८ः४५ बजे
पाँच पटकको च्याम्पियन ब्राजिल १७ औं पटक विश्वकप फुटबलको क्वाटरफाइनलमा प्रवेश गरेको छ । टोलीले लगातार आठौं पटक विश्वकपको शीर्ष ८ मा प्रवेश गरेको हो ।
जबकि क्रोएसिया तेस्रो पटक यो राउण्डमा पुग्न सफल भएको छ । सन् २०१८ को रुसमा भएको विश्वकपमा उपविजेता रहेको क्रोएसिया फाइनलमा फ्रान्ससँग ४–२ ले पराजित भएको थियो ।
अर्जेन्टिना भर्सेस नेदरल्याण्ड्स – राति ००ः४५ बजे
नेदरल्याण्ड्सले योसहित पाँचौं पटक क्वाटरफाइनलमा स्थान बनाएको हो । अर्कोतर्फ अर्जेन्टिनाले २ पटक उपाधि जितेको छ । डिएगो म्याराडोनाको कप्तानीमा अर्जेन्टिनाको टोली सन् १९८६ मा च्याम्पियन बनेको थियो । यस्तै, सन् १९७८ को विश्वकप उपाधि पनि अर्जेन्टिनाले उचालेको थियो ।
मोरक्को भर्सेस पोर्चुगल – शनिबार राति ८ः४५ बजे
यस खेलका दुवै टोलीले विश्वकप जितेका छैनन् । मोरक्को विश्वकपको यो राउण्डमा पुग्ने अफ्रिकाको चौथो देश हो । पोर्चुगल तेस्रो पटक अन्तिम ८ मा प्रवेश गरेको छ । उसले पछिल्लो पटक सन् २००६ मा अन्तिम ८ मा स्थान बनाएको थियो ।
इंग्ल्याण्ड भर्सेस फ्रान्स – शनिबार राति ००ः४५ बजे
सन् १९६६ को च्याम्पियन इंग्ल्याण्ड १० औं पटक यस राउण्डमा पुगेर सेमिफाइनलमा आफ्नो दावेदारी प्रस्तुत गरेको छ । पछिल्लो पटक पनि इंग्ल्याण्ड सेमिफाइनलसम्म पुगेको थियो जहाँ उसले क्रोएसियासँग २–१ ले हार ब्यहोरेको थियो ।
अर्कोतर्फ साविक विजेता फ्रान्सले २०१८ को विश्वकप फाइनलमा क्रोएसियालाई ४–२ ले हराउँदै उपाधि जितेको थियो । त्यसअघि फ्रान्सले १९९८ मा ब्राजिललाई हराउँदै उपाधि जितेको थियो ।
